Richard bawchér qirghizistan prézidénti bilen islahat mesililirini muzakire qildi

• 
  2006-04-11

Amérika yardemchi tashqiy ishlar ministiri richard bawchér seyshenbe küni béshkekte qirghizistan prézidénti qurmanbék baqiyéf bilen amérika - qirghiz munasiwiti we qirghizistandiki démokratik islahat mesililirini muzakire qildi.

Erkin yawropa radi'osining xewer qilishiche, muzakire témisi qirghizistanda erkin bazar igiliki we siyasiy islahat élip bérish mesililirige chétilghan. Bawchér, amérika qirghizistanning bu nishan'gha yétishi üchün yardem béridighanliqini bildürdi. Bawchérning eskertishiche, qirghizistan rehberlirining islahatni ilgiri sürüdighan waqti kélip qalghan. Bawchér bilen prézidént qurmanbék baqiyéf otturisidiki söhbet, prézidént baqiyéf memliket ichi we sirtida asasiy qanun islahati élip bérish toghrisidiki wedisini kéchiktürmekte, dep tenqidke uchrawatqan bir chaghda ötküzüldi.

Richard bawchér, qirghiz - amérika munasiwetlirining iqtisadi we bixeterlik mesililiri bilenla cheklenmeydighanliqini we buning démokratik islahatni öz ichige alidighanliqini bildürdi. U, qirghiz - amérika munasiwitini maxtidi we " shundaqla biz, qirghizistanning küchini jenubtiki döletlerge ölge qilishning yéngi idiye we mumkinchiliki üstide izdiniwatimiz " deydu.

Enjan weqesidin kéyin amérika - özbék munasiwiti we özbékistan ichki weziyitining nacharliship ketkenlikini tekitligen bawchér," biz bir hökümetning öz xelqighe bundaq mu'amile qilishini qolliyalmaymiz " dédi. Bawchér, qurmanbék baqiyéf bilen söhbet élip barghan shu küni qirghizistandiki ammiwiy teshkilatlarning wekillirini qobul qildi. Bawchérning qirghizistan sepiri uning afghanistan, pakistan, hindistan we qazaqistanlarda élip barghan ziyaritining bir qisimi.