Qirghizistanda tungganlar bilen qirghizlar arisida toqunush yüz berdi

Qirghizistan paytexti béshkek etrapidiki bir yézida yekshenbe küni qirghizlar bilen tungganlar arisida milliy toqunush yüz bérip nurghun adem yarilandi. Birleshme axbarat agéntliqining qirghizistan saqchi da'iriliridin neqil keltürüshiche, toqunushqa ikki qirghiz yashning tungganlar teripidin tayaq yéyishi seweb bolghan.

Béshkek da'irilirining melumatigha qarighanda qirghizistan boyiche tungganlarning nopusi 70 ming etrapida bolup, ularning köpchiliki 1976 - yilliri yaqupbegning qeshqeriye döliti aghdurulghandin kéyin manjularning öch élishidin qéchip qirghizistan'gha qéchip barghan. Ularning yene bir qisimi 1880 - yilliri ili taranchi sultanliqidin qachqan tungganlar idi.

Yekshenbe künki toqunushta nurghun adem yarilan'ghan. Biraq qirghizistan ichki ishlar ministirliqi bayanatchisi ayide baqirowaning eskertishiche, yaridarlar dawalinishni ret qilghanliqtin zadi qanchilik kishining yarilan'ghanliqini igiligili bolmighan. Shimaliy qirghizistanning ishqira yézisidiki qirghizlar düshenbe küni namayish ötküzüp, béshkek da'iriliridin bu yerdiki tungganlarni yötkep kétishni telep qildi. Ayide baqirowa, toqunushqa qatnashqan ademlerning sanini élan qilmidi. Emma qirghizistan metbu'atliri bu sanning 300 etrapida ikenlikini xewer qilghan. Saqchilar béshkekning 70 kilométir sherqighe toghra kélidighan weqe yüz bergen rayonda ammiwi tertipni eslige keltürüshke tirishmaqta.

Qirghizistanda 1990 - yilliri yüz bergen özbékler bilen qirghizlar arisidiki milliy toqunush, zor kölemdiki ölüm - yitim weqelirini keltürüp chiqarghan idi. (Erkin)