Қурманбек бақийеф қирғизистанниң йеңи президенти болуп сайланди


2005-07-11
Share

Қирғизистан сайлам комитети рәиси йәкшәнбә күни қирғизистанда өткүзүлгән президент сайлимида, қурманбек бақийефниң қирғиз хәлқиниң мутләқ көпчиликиниң авази билән қирғизистанниң президенти болуп сайланғанлиқини җакарлиди.

Қирғизистан сайлам комитети рә иси туйғунәли абдурәһимоф дүшәнбә күни баянат елан қилип, қурманибек бақийефниң йәкшәнбә күни өткүзүлгән сайламда авазларниң 86٪ ни қолға кәлтүргәнликини билдүрди. Униң ейтишичә, бақийефниң президент сайлимидики әң күчлүк риқабәтчиси авазларниң аран 4٪ ни қолға кәлтүргән.

Қирғизистандики президент сайлимини күзәткән, яврупа бихәтәрлик вә һәмкарлиқ тәшкилати вә яврупа парламенти мутәхәссислиридин тәшкил тапқан бир көзәткүчиләр гурупписи қирғизистанда өткүзүлгән президент сайлими тоғрисида елан қилған баянатида, бу қетимқи сайлам, әркин вә адаләтлик сайлам өткүзүш мәсилисидә қирғизистанниң хәлқара демократик өлчәмләргә йеқинлашқанлиқини көрситиду, дегән.

Йәкшәнбә күнидики сайламда авазларниң мутләқ көп қисмини қолға кәлтүргән бақийеф дүшәнбә күни бәргән баянатида, сайлам нәтҗисиниң қирғизистан хәлқиниң март ейидики хәлқ инқлабиға болған ишәнчисини ипадилигәнликини тәкитләп, қирғизистанда чирикликкә қарши күрәш қилидиғанлиқини вә президент салаһийитиниң бир қисмини баш министирға өткүзүп беридиғанлиқини билдүрди.

Бақийеф, бу йил март ейидин бери, йәни қирғизистандики әсқәр ақайеф һакимийити бир қетимлиқ хәлқ қозғилиңи билән гумран болғандин бири, қирғизистанда вақитлиқ президент вәзиписини өтәп кәлмәктә. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт