Qirghizistandiki parlamént saylimi ayaqlashti

Qirghizistan parlamént saylimidiki axirqi hel qilghuch saylam yekshenbe küni ayaqlashti. Saylam jeryanida, qismen rayonlarda qarshiliq pa'aliyetler yene dawam qildi.

Gherb metbu'atlirining xewirige qarighanda, 27 - fiwral küni ötküzülgen birinchi qarar parlamént saylimida yiterlik awazgha érishelmigen kandidatlar, ikkinchi qétimliq saylammgha qatnashqan. Birinchi qétimliq parlamént saylimida qirghizistan parlaméntidiki 75 orunning aran 31 i saylap chiqilghan bolup, qalghan köp qisim orunlar ikkinchi qétimliq saylamda bikitiletti.

Qirghizistan saylam komitétining bildürüshiche, saylam hoquqi bar bir milyon besh yüz ming kishining 60٪ i yekshenbe künidiki saylamgha qatnashqan. Saylam emeldarliri, bu qétimqi saylamning intayin tertiplik élip bérilghanliqini körsetken. Emma öktichi küchler ilgirkige oxshashla, bu qétimqi saylamdimu saylamgha xilapliq qilish ehwallirining körülgenlikini bildürgen.

Birinchi qarar parlamént saylimi axirlashqandin kéyin, qirghizistanning qismen rayonlirida saylamning adil bolmighanliqigha qarshi naraziliq heriketler dawam qilmaqta idi.

Qirghizistan prézidénti esqer aqayéf asasiy qanun boyiche, bu yil öktebirdiki prézidént saylimida wezipisidin chüshidighanliqini bildürmekte. Emma öktichi küchler, prézidént esqer aqayéfning özige mayil parlamént teshkillep, asasiy qanun'gha özgertish kirgüzüsh arqiliq, yene bir qarar prézidéntliq wezipisini qolgha keltürüshke uruniwatqanliqini körsetmekte. (Arzu)