Qirghizistandiki namayishchilar hökümet binalirini ishghal qildi

Qirghizistanning jalal'abad rayonidiki on mingdin artuq namayishchilar, yekshenbe küni bir yerlik saqchi ponkitining binasigha ot qoydi we hökümet binasini ishghal qildi.

Amérika birleshme axbarat agéntliqining xewirige qarighanda, namayishchilar yéqinda ötküzülgen parlamént saylimigha narazi bolup, prézidént esqer aqayéfning wezipisidin istipa bérishini telep qilghan.

Jalal'abad saqchiliri saqchi ponkitidin ayrilishning aldida asman'gha qaritip oq chiqirip, namayishchilarni tarqaqlashturmaqchi bolghan bolsimu, biraq namayishchilarning sani köp bolghanliqtin üstün kélelmey, axiri saqchi ponkitidin ayrilishqa mejbur bolghan.

Roytirs agéntliqining xewer qilishiche, bu seweptin saqchilar bilen namayishchilar otturisida kélip chiqqan toqunushta az digende töt neper saqchi ölgen. Toqunushta yarilan'ghanlarning sani téxi éniq emes iken.

Qirghizistan hökümet da'iriliri téximu köp zorawanliq heriketlirining aldini élish üchün, namayishchilar bilen söhbet ötküzüshke teyyar ikenlikini bildürdi. Biraq, namayishchilarning rehbiri qurmanbék baqayéf peqet prézidént esqer aqayéf bilen biwaste söhbet élip bérishqa qoshulidighanliqini körsetti. U yene, qirghizistan hökümitini namayishchilargha qarshi qoral küchi ishletmeslikke chaqirip, qoral küchi ishlitishning peqet hökümetke bolghan qarshiliqni kücheytidighanliqini bildürgen.

Yéqinqi künlerdin buyan, qirghizistanning jenubiydiki bir qanche sheherlerde keng kölemde namayishlar yüz bergen. Namayishchilar qirghizistanning hakimiyettiki partiyisining parlamént saylimida mutleq üstünlükke érishkenlikidin qattiq ghezeplen'genlikini ipadiligen idi.

Qirghizistandiki öktichi partiyiler we musteqil halda saylamni küzetküchilerning éytishiche, parlamént saylimida, biletni sétiwélish, öktichi namzatlarning kandidatliq salahiyitini élip tashlash we metbu'atlarni kontrol qilishtek saylamgha xilapliq qilmishlar köp körülgen. Bu arida, yawrupa bixeterlik we hemkarliq teshkilati ikki terepni qoralliq toqunushushning aldini élip, söhbet élip bérishqa chaqirdi. (Arzu)