Qirghizistanning jenubidiki naraziliq namayishliri kücheymekte

Qirghizistandiki parlamént saylimigha narazi bolghan namayishchilar qirghizistandiki ikkinchi chong sheher hisablan'ghan osh shehiridiki bir qisim hökümet binalirini igilep, prézidént esqer aqayéfning wezipisidin istipa bérishini telep qildi.

Amérika birleshme axbarat agéntliqining xewirige qarighanda, texminen mingdek namayishchi düshenbe küni osh shehiridiki hökümet, bixeterlik idarisi we saqchi idarisining binalirini igiliwalghan. Osh shehiri qirghizistanning jenubiy qismigha jaylashqan. Buning aldida 15 mingdin artuq namayishchilar jenubtiki jalal'abad shehirinimu kontrol qilghan idi. Melumatlargha qarighanda, mushu xildiki namayishlar yene az dégende qirghizistandiki sekkiz sheherde élip bérilmaqta iken.

Qirghizistan saqchi da'iriliri düshenbe künidiki namayishta saqchilar bilen namayishchilar arisida toqunush yüz bermigenlikini bildürmekte.

Bu arida, qirghizistan bash ministiri tanayéf, hökümetning namayishchilar bilen söhbet ötküzüshni xalaylidighanliqini bildürüp, namayishchilargha qarshi qoral küchi ishletmeslikke wede qilghan. Biraq, öktichilerning rehberliri prézidént esqer aqayéf qatnashmighan söhbetning ehmiyiti bolmaydighanliqini körsetmekte.

Qirghizistanning jenubiy qismidiki namayishlar 27 - fiwral küni ötküzülgen parlamént saylimidin kéyin bashlan'ghan. 13 - Mart künidiki axirqi saylamda esqer aqayéfni qollighuchilar we uning tuqqanliri parlaménttiki 90٪ orunni igiligendin kiyin, öktichiler saylamning adil we rastchil bolmighanliqini bildürüp, naraziliq pa'aliyetlirini kücheytken.

Xewerge qarighanda, qirghizistan prézidénti esqer aqayéf namayishchilarni bésiqturush üchün, düshenbe küni merkizi saylam komitéti we aliy sot mehkimisini parlamént saylimi üstidin qayta tekshürüsh élip bérishni buyrighan. Biraq bir qisim analizchilarning körsitishiche, qirghizistandiki namayishlar barghansiri omomiyüzlük ehwalgha qarap yüzlenmekte iken.

Bu arida, amérika hökümiti qirghizistandiki her qaysi tereplerni "qanun boyiche, tinchliq bilen" ixtilaplarni hel qilishqa chaqirdi. (Arzu)