Qirghizistan prézidénti, ichki ishlar ministirini wezipisidin élip tashlidi

Qirghizistan prézidénti esqer aqayéf, ichki ishlar ministiri bakirdin subanbékof bilen qirghizistan bash teptishi miqtibeg abdillayéfni wezipisidin élip tashlidi. Aqayéf subanbékofning ornigha mu'awin bash ministiri keneshbeg döshebayéfni waqitliq ichkiy ishlar ministiri, marat sultanofni waqitliq bash teptish qilip teyinligen.

Bu arida qirghizistanning jenubidiki jala'abad, osh qatarliq oblastlardiki aqayéfqa qarshi naraziliq herikiti paytext béshkekke yamridi. Qirghizistan amanliq küchliri charshenbe küni béshkektiki alatow meydanida namayish qilmaqchi bolghan öktichilerning herikitini tosup, 20 din artuq kishini qolghan alghan. Roytérs axbarat agéntliqi saqchilarning zorawanliq küch qollunup, alatow meydanidiki namayishchilarni tarqitiwetkenlikini xewer qildi.

Aqayéf, seyshenbe küni öktichilerge qarshi zorawanliq küch qollanmaydighanliqini bildürgen idi. Roytérs axbarat agéntliqining xewer qilishiche, öktichiler herikitidiki rehberlerning biri topchubeg turghan'eliyéw, " ichki kabinttiki özgirish bizni qana'etlendürelmeydu, biz üchün eng muhimi aqayéfni qoghliwétish," dep tekitligen. U, aqayéfni qoghliwetmigiche toxtimaydighanliqini ilgiri sürmekte.

Öktichiler peyshenbe küni béshkekte namayish ötküzüsh üchün toplanmaqtiken. Amma qirghizistan amanliq küchliri narin, osh, talas, jalal'abad qatarliq jaylardin kélidighan namayishchilarni tosash üchün, béshkek shehirining kirish - chiqish éghizlirini kontrol qilghan. Qirghizistan prézidénti aqayéfning wezipisidin istipa bérishini telep qilghan öktichiler, osh, jalal'abad qatarliq jaylardiki hökümet organlirini igiliwalghan. (Erkin)