Qazaqistanda prézidént saylimi boldi

Yekshenbe küni qazaqistanda prézidént saylimi bolup ötti. Pütün qazaqistandiki 9 mingdin artuq saylam nuqtisi qazaqistan dölet naxshisining yangraq sadasi ichide bélet tashlashni bashlighan bolup, bu qazaqistan musteqil bolghandin kéyinki üchinchi qétimliq prézidént saylimidur.

Qazaqistan metbu'atlirining uchurliridin qarighanda, bu qétimqi saylamgha sekkiz milyon 700 mingdin artuq adem qatnashqan bolup, bu pütün nopusning yérimini teshkil qilidiken.

Prézidént nursultan nazarbayéw yekshenbe küni kechte astanadiki döletlik rus tiyatirida nutuq sözlep, mezkur saylamning nahayiti adil, ochuq-ashkara we démokratik keypiyatta ichide ötkenlikini körsetken, emma nazarbayéwning riqabetchiliri bu qétimqi saylamning xelq'ara ölchemlerge chüshmeydighanliqi, prézidétning barliq ammiwi axbarat wastilirini öz namzitining teshwiqati üchün ishletkenlikini, bashqa namzatlargha tosalghuluqlar peyda qilin'ghanliqini tenqid qilghan. B b s agéntliqining uchuridin qarighanda nazarbayéwning eng küchlük riqabetchisi," adil qazaqistan üchün" birleshmisining rehbiri jarmaxan tuyaqbayéw bu saylamning rastchil bolmighanliqini bildürgen.

Qazaqistandiki prézidént saylimigha xelq'ara közitish teshkilatlirining 1600 din artuq adimi közetküchi süpitide qatnashqan bolup, yawropa bixeterlik we hemkarliq teshkilati mezkur saylamning yenila xelq'ara démokratik saylam ölchemlirige layiq emeslikini körsetken,

Közetküchiler bu qétim nazarbayéwning bashqa töt neper prézidént namzitining yéngip, qayta prézidént bolushining éhtimanlliqining zorliqini bildürüshmekte. Eger undaq bolsa, nazarbayéw yene yette yil prézidént bolup, uning hakimiyettiki waqti 20 yildin éship kétidu. (Ümidwar)