Özbékistan soti diniy esebiylik bilen eyiblen'gen 20 kishi üstidin höküm chiqardi

Özbékistan soti, peyshenbe küni 20 kishini yer asti radikal islamiy teshkilatning ezasi dep eyiblep, besh yildin 17 yilighiche qamaq jazasigha höküm qildi.

Fransiye agéntliqining xewer qilishiche, qamaq jazasigha höküm qilin'ghanlarning hemmisi tashkentning oxshash nahiyisidin bolup, asasi qanun tüzümini aghdurushqa urunush jinayiti bilen eyiblen'gen.

Eyiblen'güchilerning adwokati rustem rexmetullayof, bérilgen hökümning intayin éghir ikenlikini tekitlep, sotchi bizning erzimizni qet'iy nezerge almidi dégen.

Fransiye agéntliqining xewer qilishiche, sotning hökmi sot etrapida toplan'ghan eyiblen'güchilerning uruq- tughqanliri arisida qattiq ghulghula qozghighan. Bir neper kishilik hoquq pa'aliyetchisi saqchi teripidin tutup kétilgen.

Sot etrapida toplan'ghan bezi anilar, néme üchün namaz oqighanlargha bundaq qattiq jaza bérilidu, dep özlirining sotning hökmige bolghan naraziliqini bildürgen.

Bu, 13- may küni enjanda yüz bergen weqedin kéyin, ötküzülgen tunji chong kölemlik sotlash hésablinidu. Enjandiki weqeler 23 sodigerning islamiy teshkilatlargha yardem qilghan dep qolgha élinishi netijiside kélip chiqqan idi.

Xelq'ara kishilik hoquq teshkilatliri prézidént islam kérimof hökümitini, xelq'ara térrorchiliqqa qarshi urushtin, diniy perizini ada qilghan kishilerni basturush üchün paydiliniwatidu dep eyiblimekte. (Qanat)