Қирғизистанда заказлиқ өлтүрүшләр давамлашмақта


2005-06-12
Share

Қирғизистанниң дөләтлик "қабар" агентлиқиниң учуриға қариғанда, 10-июн күни қирғизистан парламентиниң бир нәпәр әзаси намәлум кишиләр тәрипидин суйиқәст билән өлтүрүлгән.

Җирғалбек сурабалдийев исимлик мәзкур парламент әзасиниң өстүрүлүш вәқәси парламент бинаси әтрапида йүз бәргән. Хәвәрләргә қариғанда қирғизистан һөкүмити вә ички ишлар министирлики һәм дөләт бихәтәрлик идариси бу вәқәгә җиддий қарап, тез сүрәттә делони ениқлашни башлиған.

Һазир қирғизистан җәмийитидә мәзкур парламент әзаси һәққидә һәр хил учурлар тарқалған болуп, униң 24-март күни бишкәк шәһиридә йүз бәргән булаңчилиқ вәқәси билән мунасивәтлик икәнлики илгири сүрүлмәктә. Ташқи ишлар министири роза отунбайева уни 24-марттики булаңчилиқ вәқәсини тәшкилләш билән әйиблигән икән.

Бу қирғизистандики демократик инқилаб ғәлибә қилғандин кейин йүз бәргән бир қанчә қетимлиқ заказлиқ өлтүрүш вәқәлириниң биридур.

Хәвәрләргә қариғанда, қирғизистанда президент сайлими йеқинлишиватқан бу күнләрдә, кишиләр аммиви қалаймиқанчилиқларниң йүз беришидин әнсиримәктә. Чүнки, өзлирини демократлар дәп атиған өктичиләр әсқәр ақайевни ағдуруп, һакимийәтни қолға алған болсиму, бирақ вәзийәтниң техи толуқ муқимлашмиқанлиқи билдүрүлмәктә.

Қирғизистандики мундақ суйиқәст билән өлтүрүш вәқәлири бурундин тартипла изчил давамлашқан болуп, буниңдин бир қанчә йиллар илгири қирғизистан уйғурлириниң "иттипақ" җәмийитиниң рәиси, уйғур паалийәтчиси ниғмәт һаҗи босақовму суйиқәст билән өлтүрүлгән иди. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт