Xitay xelq qurultiyi tajikistan bilen tüzgen térrorchiliqqa qarshi kélishimni maqullidi

Amérika birleshme axbarat agéntliqining xewirige qarighanda, xitayning mu'awin tashqi ishlar ministiri juw winjung xelq qurultiyi da'imiy komitéti ezalirigha "dölet bixeterlikige kapaletlik qilish üchün, ottura asiya döletliri bilen üch xil küchlerge qarshi hemkarliqni kücheytish intayin muhim wezipe "dep bildürgen. U yene " Uyghurlarning musteqilliq herikiti xitay we ottura asiyadiki eng chong tehdid " dep körsetken.

Kélishimge asasen, ikki dölet saqchi da'iriliri munasiwetlik dilolarni birlikte razwétka qilidiken, qererlik uchrushidiken, shundaqla uchur almashturush we téxnika jehettin hemkarlishish sistémisini qurup chiqidiken. Bu kélishim yene, xitay saqchilirining tajikistandiki Uyghur musteqilliq heriketlirini basturishigha yol échip béridiken.

Xitay hökümiti 2001 - yili ottura asiyadiki töt dölet bilen bu xil kélishimlerni imzalighan. Xitay xelq qurultiyi tajikistandin bashqa döletler bilen tüzgen kélishimlerni alliburun maqullighan idi.

Xitay hökümiti gerche Uyghur milliy musteqilchilirini térrorchiliqqa chétip kéliwatqan bolsimu, biraq kishilik hoquq teshkilatliri xitay hökümitining térrorchiliqqa qarshi köreshtin paydilinip, Uyghur élige bolghan kontrolluqini kücheytishke we öz siyasiy- iqtisadiy hoqoqini kapaletke ige qilish üchün térishiwatqan tinchliqperwer Uyghurlarni basturushqa uruniwatqanliqini bildürmekte. (Arzu)