Afghanistanda tutup turiliwatqan taliban gumandarliridin 85 i qoyup bérildi

Amérika herbiy xadimliri, yekshenbe küni afghanistandiki amérika herbiy bazilirida tutup turiliwatqan taliban gumandarliridin 85 kishining qoyup bérilgenlikini bildürdi.

Ularning yétishiche, musulmanlarning eng chong ikki diniy bayrimining biri hésablan'ghan, qurban bayrimining yéqinlishishi munasiwiti bilen qoyup bérilgen taliban gumandarlirining héchbiri bixeterlik üchün chong bir tehdid hésaplanmaydiken.

Bezi mulahizichilerning bildürüshiche, yéqinda afghanistan hökümiti amérika tereptin chong bir jinayet sadir qilmighan we taliban gumandari dep tutup turiliwatqan kishilerning qoyup bérilishini telep qilghan iken.

Lékin, bezi xewerlerge qarighanda, amérika herbiy xadimliri mötidil talibanlarni afghanistan hökümitining kechürüm teklipini qobul qilishqa ündesh üchün mezkur taliban gumandarlirini qoyup bergen.

Afghanistan prézidénti hamid karzay we amérikining afghanistandiki bash elchisi zelmey xelilzad yéqinda el-qa'ide bilen munasiwiti bolmighan we jinayet ötküzmigen talibanlarning afghanistan'gha qaytip kélishini qarshi alidighanliqini bildürgen idi.

Emma afghanistan prézidénti hamid karzayning bayanatchisi hamit ilmiy, yekshenbe küni 85 taliban gumandarining qoyup bérilishining hökümetning kechürüm teklipi bilen munasiwetsiz ikenlikini tekitlidi. (Qanat)