Қазақистанда өктичиләрниң бир гезити һөкүмәт тәрипидин пичәтләнди

Қазақистан учур министирлиқи қазақистанда өктичилики билән нам чиқарған бир гезитни тақаш тоғрисида буйруқ чүшүргән. Учур министирлиқи, "респоблика" гезитини русийилик бир сиясәтчиниң қазақларни кәмситиш характерлик сөзлирини гезиткә басқан, дәп әйиблигән. Әмма мәзкур гезитниң муавин баш муһәррири галина дирдина, учур министирлиқиниң гезитни пичәтләш буйруқи сияси мәқсәткә игә, дәп әйиблигән вә сот мәһкимисигә әрз сунидиғанлиқини җакарлиған.

"Респоблика" гезити һазирға қәдәр көп қетим һуҗумға учриған шундақла даириләр тәрипидин бир қанчә қетим сотқа тартилған иди. Һөкүмәтниң юқириқи қарарини тәнқид қилғучилар, бу назабайев һөкүмитиниң бу йил 12 - айда өткүзүлидиған президент сайлимидин бурун, ахбарат әркинликини бастуруш һәрикитиниң бир қисими, дәп көрсәтмәктә.

Назарбайев, 1991 - йили қазақистан мустәқил болғандин бери мәзкур дөләтни идарә қилип кәлтмәктә. У, бу йил 12 - айда елип берилидиған прездент сайлимида намзат болидиғанлиқини җакарлиған. Әгәр у сайламда ғәлибә қилип қалса йәнә 7 йил һоқуқ тутиду. Назарбайев, қирғизистандики вәқәләрдә ақайевни өктичиләргә юмшақ қоллуқ қилиш билән әйиблигән шундақла украинийә вә қирғизистанлардики инқилаб қазақистанда йүз бәрмәйду, дәп көрсәткән иди.

Бирләшмә ахбарат агентлиқиниң хәвәр қилишичә, қазақистан пайтәхти астанида, йәкшәнбә күни сақчилар сериқ рәң шарпа артқан, сериқ рәң байрақ көтәргән яшларни урған. Сериқ рәң украинийә инқилабиниң символи иди.(Әркин)