Qazaqistanda öktichilerning bir géziti hökümet teripidin pichetlendi

Qazaqistan uchur ministirliqi qazaqistanda öktichiliki bilen nam chiqarghan bir gézitni taqash toghrisida buyruq chüshürgen. Uchur ministirliqi, "réspoblika" gézitini rusiyilik bir siyasetchining qazaqlarni kemsitish xaraktérlik sözlirini gézitke basqan, dep eyibligen. Emma mezkur gézitning mu'awin bash muherriri galina dirdina, uchur ministirliqining gézitni pichetlesh buyruqi siyasi meqsetke ige, dep eyibligen we sot mehkimisige erz sunidighanliqini jakarlighan.

"Réspoblika" géziti hazirgha qeder köp qétim hujumgha uchrighan shundaqla da'iriler teripidin bir qanche qétim sotqa tartilghan idi. Hökümetning yuqiriqi qararini tenqid qilghuchilar, bu nazabayéw hökümitining bu yil 12 - ayda ötküzülidighan prézidént saylimidin burun, axbarat erkinlikini basturush herikitining bir qisimi, dep körsetmekte.

Nazarbayéw, 1991 - yili qazaqistan musteqil bolghandin béri mezkur döletni idare qilip keltmekte. U, bu yil 12 - ayda élip bérilidighan prézdént saylimida namzat bolidighanliqini jakarlighan. Eger u saylamda ghelibe qilip qalsa yene 7 yil hoquq tutidu. Nazarbayéw, qirghizistandiki weqelerde aqayéwni öktichilerge yumshaq qolluq qilish bilen eyibligen shundaqla ukra'iniye we qirghizistanlardiki inqilab qazaqistanda yüz bermeydu, dep körsetken idi.

Birleshme axbarat agéntliqining xewer qilishiche, qazaqistan paytexti astanida, yekshenbe küni saqchilar sériq reng sharpa artqan, sériq reng bayraq kötergen yashlarni urghan. Sériq reng ukra'iniye inqilabining simwoli idi.(Erkin)