Қирғизистан уйғурларниң қурултай ечиш пиланини бикар қилди

Сәйшәнбә күни қирғизистан һөкүмити буйруқ чүшүрүп, уйғурларниң қирғизистан дөләтлик опера сарийида өткүзмәкчи болған қурултийини бикар қилған .

Франсийә ахбарат агентлиқиниң қирғизистан уйғур иттипақиниң рәиси рози мәмәт абдулбақийифниң сөзини нәқил кәлтүрүшичә, қирғизистан президенти әсқәр ақайофниң сиясий баш мәслиһәтчиси османакун ибраһимоф өткән һәптә өткүзүлмәкчи болған қурултайни һәммә тәйялиқлар пүтүп болған, ахирқи минутларда, өткүзмәслик тоғрисида буйруқ чүшүргән .

Хәвәрдә ейтилишичә, қирғизистан президентиниң мәслиһәтчиси розимәмәткә "хитай- қирғизистанниң дости дәп қаралған вә бизгә ярдәм қиливатқан бир дөләт, дөләт игиликидики бир йәрдә бундақ бир қурултай өткүзүш хитай һөкүмитидә хата чүшәнчә пәйда қилиши мумкин" дигән.

Кишилик һоқуқ паалийәтчилири хитай һөкүмитиниң уйғурларни бастуруш вә тинҗиқтуруш үчүн чәтәлләрдә җидди паалийәт елип бириватқанлиқини билдүрмәктә.

Кишилик һоқуқ паалийәтчилири шундақла, қирғизистан вә қазақистан һөкүмәтлирини мәзкур дөләтләрдин сиясий панаһлиқ тилигән уйғур сиясий паалийәтчилирини хитайға қайтуруп бериш арқилиқ, уларниң хитай һөкүмити тәрипидин етип өлтүрүлишигә сәвәпчи болғанлиқини билдүрди.

Дүшәнбә күни қирғизистан вә хитай һөкүмәт хадимлири җинайәтчиләрни қайтуруп бериш тоғрисида йеңи бир келишим имзалиди . Сиясий анализчилар бу килишимниң қирғизистан һөкүмитиниң техиму көп уйғур паалийәтчисни хитайға қайтуруп беришигә вә техиму көп уйғур паалийәтчисиниң хитай һөкүмити тәрипидин етип өлтүрүлишигә сәвәп болуши мумкин дейишмәктә. (Әқидә)