Yawrupa özbékistan'gha qaratqan imbargoni yene bir yil uzartti

Yawrupa ittipaqi 2005‏- yili 5‏- ayning 13‏- küni yüz bergen enjan weqesidin kéyin, özbékistan'gha qarita yolgha qoyghan imbargoni dawamlashturushni qarar qildi.

Amérika birleshme agéntliqining xewer qilishiche, yawrupa ittipaqi tashqi ishlar minstirliri düshenbe küni özbékistan'gha qaratqan qoral imbargosini yene bir yil uzartish toghrisida qarar qobul qilghan. Emma, yawrupa döletlirini ziyaret qilishi cheklen'gen özbékistan hökümet xadimlirining sanini 12 din 8 ge chüshürgen.

Özbékistan hökümiti, yawrupa ittipaqining enjandiki basturush heqqide xelq'araliq tekshürüsh élip bérilishigha ruxset bérishi toghrisidiki teleplirini ret qilghandin kéyin, yawrupa ittipaqi özbékistan'gha qarshi imbargo yolgha qoyup, yawrupa döletlirining özbékistan'gha qoral sétishini hemde özbékistan hökümet rehberlirige yawrupa döletlirini ziyaret qilish üchün wiza bérishni chekligen idi.

Lékin yéqindin béri yawrupa ittipaqi bilen özbékistan otturisidiki munasiwetlerde ilgirilesh boldi. Özbékistan hökümiti yawrupa ittipaqining kishilik hoquq mesilisi toghrisidiki bezi teleplirini qobul qilip, yawrupa ittipaqi bilen enjan weqesi heqqide söhbet élip bérishqa maqul bolghan. Özbékistanning bu pozitsiyisi yawrupa ittipaqigha eza bezi döletlerning özbékistan'gha qarita yolgha qoyulghan imbargoni bikar qilish teklipini otturigha qoyushigha seweb bolghan.

Emma, xelq'ara kishilik hoquq teshkilatliri, enjan weqesidin kéyin kishilik hoquqning özbékstandiki weziyitining téximu nacharlashqanliqini tekitlep, yawrupa ittipaqidin özbékistan'gha qarita yolgha qoyghan imbargosini dawamlashturushni telep qilghan idi. (Ömer qanat)