Özbékistanning weziyiti heqqide türlük analizlar meydan'gha kelmekte


2007-08-23
Share

Xelq'aradiki tetqiqat merkezliridin biri bolghan, xelq'ara krizis guruppisi özbékistandiki weziyet heqqide doklat élan qilip, özbékistanning hazirqi weziyiti hem özbékistan üchün hem rayon üchün xeterlik dep körsetti.

Doklatta bayan qilinishiche, prézidént kerimofning wezipe ötesh mudditi alliqachan axirlashqan bolsimu, emma hazirghiche kerimofning prézidéntliq wezipisini tapshurudighanliqi toghrisida héchqandaq bisharet mewjut emes iken. Doklatta éytilishiche, bu weziyet, özbékistanda prézidént kerimoftin kéyin, hakimiyet talishish jédili yüz bérishining mumkinchiliki we bu jédelning toqunushlargha seweb bolush éhtimalliqining barliqini körsitidiken.

Xelq'ara krizis guruppisining mu'awin re'isi jon grinwald mezkur doklat heqqide azadliq radi'osigha bergen bayanatida," körünüshte özbékistandiki weziyet nöwette xéli tinchtek körünidu. Lékin xeter aldimizda" dégen.

Bayanatida, özbékistandiki kishilik hoquq weziyitining künséri nacharlishiwatqanliqini tekitligen grinwald, kishilik hoquq pa'aliyetchiliri, muxbirlar we siyasiy öktichilerge qaritilghan basturushning üzlüksiz dawamlishiwatqanliqini bildürdi.

U, yawropa ittipaqidin özbékistan'gha qarita yolgha qoyghan cheklik imbargosini dawamlashturushini telep qildi shundaqla xelq'ara jama'etni özbékistan rehberlirining chet'ellerdiki mal-mülüklirini musadire qilishqa chaqirdi. (Eqide)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet