Өзбекистан билән қирғизистан виза түзүмини вақтинчә бикар қилди


2007.02.18

Өзбекистан билән қирғизистан арисидики йәттә йилдин буян давамлишиватқан виза түзүми вақтинчә бикар қилинди.

Америка авази радиосиниң игилигән учуридин қариғанда, өзбекистан билән қирғизистан арисидики қара су қатарлиқ чегра понкитлирида 15 - фәвралдин етибарән икки тәрәп аһалилириниң визасиз берип келиши башланған. Бирақ, бу визасиз берип келишниң мөһлити 60 күн болуп, мөһләт тошқандин кейин йәнә қандақ бәлгилимә чиқидиғанлиқи һазирчә мәлум әмәс икән.

Өзбекистан билән қирғизистан арисидики виза түзүми 1999 - 2000 - йиллирида өзбекистан исламий һәрикити дәп аталған тәшкилатниң қирғизистанниң баткән қатарлиқ җәнубий вилайәтлиридә қораллиқ һәрикәтлири йүз бәргәндә йолға қоюлған иди.

Әслидә өзбекистан –қирғизистан чегрисиниң икки тәрипидики әнҗан вә ош вилайәтлиридики аһалилар әсирләрдин бәри әркин берип келиш қилған, уларниң арисида дөләт чегра уқуми болмиған иди, бирақ 2000 - йили виза түзүми йолға қоюлуш билән икки тәрәп пуқралири арисиға нурғун қолайсизлиқлар келип чиққан. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.