Қирғизистанда өктичиләр йеңи һөкүмәт тәшкиллиди

Қирғизистан президенти әсқәр ақайев, 24 - марттики аммиви наразилиқ һәрикитидин қорқуп чәтәлгә қечип кәткәндин кейин, қирғизистан парламенти пәйшәнбә күни өктичиләр рәһбири, сабиқ қирғизистан баш министири қурманбәг бақийевни қирғизистанниң вақитлиқ президенти шундақла баш министир қилип тәйинлиди.

Қурманбәг бақийев, президент сайлиминиң бу йил 6 - айда елип берилидиғанлиқини җакарлиған. Бирақ у сайламниң конкерт күнини тилға алмиди. " Һазирқи әң җидди мәсилә йеңи һөкүмәтни тәшкил қилиш шундақла иҗтимаий тәртип вә муқимлиқни әслигә кәлтүрүш," дәп тәкитлигән бақийев, " асаси қанун бойичә президент сайлими үч ай ичидә елип берилиши керәк, биз асаси қанун бойичә ишқилимиз," дәп көрсәтти.

Хәвәрләргә қариғанда ақайев қазақистанға қечип беривалған. Русийә президенти владимир путин, " әгәр ақайев русийигә келишни халиса, биз уни рәт қилмаймиз," дәп тәкитлиди. Амма бақийев, русийә билән болған әнәниви мунасвиәтни өзгәртиш нийити йоқлиқини билдүрди.

Бу арида пайтәхт бешкәкдә кечиси кочиға чиқиш чәкләнгән. Йеңи қурулған 10 кишилик ички кабинттики филикс қулов ички ишлар вә бихәтәрликкә мәсул болди. Роза отанбайева ташқи ишлар министири қилип тәйинләнгән. Бу арида қирғизистан президенти ақайев, өктичиләрниң һәрикитини "сияси өзгириш," дәп әйиплиди. У, вәзиписидин истипа бәргәнликини рәт қилған шундақла қирғизистандин вақитлиқ айрилғанлиқини илгири сүргән. (Әркин)