Qirghizistanda öktichiler yéngi hökümet teshkillidi

Qirghizistan prézidénti esqer aqayéw, 24 - marttiki ammiwi naraziliq herikitidin qorqup chet'elge qéchip ketkendin kéyin, qirghizistan parlaménti peyshenbe küni öktichiler rehbiri, sabiq qirghizistan bash ministiri qurmanbeg baqiyéwni qirghizistanning waqitliq prézidénti shundaqla bash ministir qilip teyinlidi.

Qurmanbeg baqiyéw, prézidént saylimining bu yil 6 - ayda élip bérilidighanliqini jakarlighan. Biraq u saylamning konkért künini tilgha almidi. " Hazirqi eng jiddi mesile yéngi hökümetni teshkil qilish shundaqla ijtima'iy tertip we muqimliqni eslige keltürüsh," dep tekitligen baqiyéw, " asasi qanun boyiche prézidént saylimi üch ay ichide élip bérilishi kérek, biz asasi qanun boyiche ishqilimiz," dep körsetti.

Xewerlerge qarighanda aqayéw qazaqistan'gha qéchip bériwalghan. Rusiye prézidénti wladimir putin, " eger aqayéw rusiyige kélishni xalisa, biz uni ret qilmaymiz," dep tekitlidi. Amma baqiyéw, rusiye bilen bolghan en'eniwi munaswi'etni özgertish niyiti yoqliqini bildürdi.

Bu arida paytext béshkekde kéchisi kochigha chiqish cheklen'gen. Yéngi qurulghan 10 kishilik ichki kabinttiki filiks qulow ichki ishlar we bixeterlikke mes'ul boldi. Roza otanbayéwa tashqi ishlar ministiri qilip teyinlen'gen. Bu arida qirghizistan prézidénti aqayéw, öktichilerning herikitini "siyasi özgirish," dep eyiplidi. U, wezipisidin istipa bergenlikini ret qilghan shundaqla qirghizistandin waqitliq ayrilghanliqini ilgiri sürgen. (Erkin)