Уйғур аптоном районлуқ вәкилләр өмики өзбекистанни зиярәт қилмақта

Уйғур аптоном районлуқ ташқи сода вә иқтисадий һәмкарлиқ идарисиниң муавин рәиси ли җинйүн башчилиқида бир хитай вәкилләр өмики өзбекистан сода санаәтчиләр бирләшмисиниң тәклипи билән өзбекистанни зиярәт қилмақта.

16 Кишидин тәшкил тапқан уйғур аптоном районлуқ бу вәкилләр өмикиниң зиярәтниң мәқсити, өзбекистан билән хитай сода вә тиҗарәт даирилири оттурисидики һәмкарлиқини техиму күчәйтиш вә хитай тиҗарәтчилирини өзбекистанда мәбләғ селишқа рәғбәтләндүрүштин ибарәт икән.

Өзбекистан тиҗарәт вә санаәтчиләр бирләшмисиниң билдүрүшичә, хитай вәкилләр өмики ташкәнтдин башқа йәнә сәмәрқәнд, бухара, хевә шәһәрлириниму зиярәт қилидикән.

Ташкәнтдики хитай баш әлчиханисиниң тиҗарәт вә сода ишлири хадими җан ди, хитай ширкәтлириниң өткән йили өзбекистанға салған мәблиғиниң 30 милйон америка доллириға йәткәнликини тәкитләп, әмма бу наһайити аз, хитай һөкүмити хитай ширкәтлирини өзбекистанға техиму көп мәбләғ селиш үчүн рәғбәтләндүриду, деди.

Хитай өзбекистанниң дунядики әң чоң тиҗарәт шириклириниң бири һесаблиниду. Икки дөләт оттурисидики тиҗарәт һәҗми өткән йили 480 милйон америка доллириға йәткән иди. Бу йил хитай билән өзбекистан оттурисидики тиҗарәттә зор илгирләш мәйданға кәлгән болуп, 2006 ‏- йилиниң биринчи үч йилидики икки дөләт оттурисидики тиҗарәт һәҗми 196 милйонға йәткән.

Сиясий мулаһизичиләр, уйғур аптоном раюнлуқ һөкүмәт вәкилләр өмикиниң, өзбекистан һөкүмитиниң канада пуқраси һүсәнҗан җилилни хитайға тапшуруп беришидин икки һәптә кейин, өзбекистанни зиярәт қилғанлиқиға диққәт тартмақта. (Қанат)