Xitay- qazaqistan hemkarliq komitéti yighini astanide échildi

• 
  2005-07-14

Xitay-qazaqistan hemkarliq komitétining 2 - qétimliq yighini peyshenbe küni qazaqistanning paytexti astanide ötküzüldi. Yighin'gha xitayning mu'awin bash ministiri wu yi bilen qazaqistanning mu'awin bash ministiri exmetjan yésimof riyasetchilik qildi.

Wu yi yighinda, xitay-qazaqistan ikki dölet munasiwetlirining yéqinqi yillardin buyan barghanséri qoyuqliship, hemkarlishish saheliriningmu barghanséri kéngiyip méngiwatqanliqini tekitlidi. U yene, xitay dölet re'isi xu jintawning 10 kün aldida qazaqistan'gha qilghan sepirining ghelibilik bolghanliqini, shundaqla ikki dölet rehberlirining ortaq xitay-qazaqistan isitratégiyilik hemkarliq munasiwitini ornatqanliqini eskertti.

Qazaqistanning mu'awin bash ministiri yésimof wu yining ikki dölet munasiwitidiki bahasigha tamamen qoshulidighanliqini bildürüsh bilen birge, xitay hökümitining qazaqistanning dunya sehiye teshkilatigha kirishini qollighanliqigha teshekkür éytti hemde xitayning teywen mesilisidiki prinsipal meydanini pütünley qollaydighanliqini tekitlidi.

Ikki terep yene, mezkur komitétning buningdin kéyinki wezipiliri üstide toxtilip, ikki döletning buningdin kéyin soda, qatnash, maliye, énérgiye we bixeterlik qatarliq nurghun sahediki hemkarliqni téximu kücheytishi kéreklikini bildürdi. Ular buningdin sirt yene, igilik hoquq, bixeterlik we jem'iyet muqimliqi mesililiride bir-birini qollap, "3 xil küchke zerbe bérish" jehettiki hemkarliqni téximu kücheytish lazimliqini tekitlidi.

Xitay-qazaqistan hemkarliq komitéti ötken yili qurulghan bolup, ikki terep emeldarliri yilda bir qétim uchrishidu. (Peride)