Хитай қазақистанға икки дөләт арисида 2 - нефит турубиси ятқузуш тәклипи бәргән

Қазақистан ташқий ишлар министири қасим җүмәрт тоқайеф, пәйшәнбә күни хитайда елип барған зияритини ахирлаштуруштин бурун, бейҗиң даирилириниң хитай - қазақистан арисида 2 - нефит турубиси ятқузуш пиланини оттуриға қойғанлиқини билдүрди. Тоқайеф пәйшәнбә күни бейҗиңдин айрилиш алдида қазақистанниң бейҗиңдики әлчиханисида хитайниң сиясий вә иҗтимаий қатлимидики әрбапларға сөз қилип, бу қетимқи хитай сәпиридә бейҗиң һөкүмитиниң қазақистан билән хитай арисиға 2 - нефит турубисини қуруш пиланини оттуриға қойғанлиқини вә бу пилан үстидә музакирә елип барғанлиқини ашкарилиди.

Тоқайефниң әскәртишичә, қазақистан нефит игилики хитай билән һәмкарлиқ елип баридиған муһим саһәгә айлинип қалған. Хитай билән қазақистан арисиға илгири оттура қазақистандики атасудин алатав еғизиғичә ятқузулған нефит турубиси өткән йили 12 - айда пүтти. Тоқайефниң ашкарилишичә, у хитай ташқий ишларминистири билән икки дөләтниң узун муддәтлик һәмкарлиқини илгири сүрүш лайиһисиниң дәсләпки нусхиси үстидә пикир бирлики һасил қилған. Лекин тоқайеф, бу лайиһиниң тәпсилий деталлири вә бу қетимқи сәпиридә йәнә қандақ мәсилиләр өстидә музакирә елип барғанлиқини тилға алмиди.

Қазақистан хитайниң шаңхәй гуруһидики шәрқий түркистан күчлиригә қарши туруш мәсилисидә бейҗиң билән һәмкарлишидиғанлиқини билдүргән иттипақдашлириниң бири. Тоқайефниң әскәртишичә, улар 2010 - йилғичә хитай - қазақистан арисидики сода һәҗимини 10 милярд долларға чиқиришни пиланлиған. Тоқайеф, бейҗиңдики зияритини сәйшәнбә күни башлиған иди.