Xitay qazaqistan'gha ikki dölet arisida 2 - néfit turubisi yatquzush teklipi bergen

Qazaqistan tashqiy ishlar ministiri qasim jümert toqayéf, peyshenbe küni xitayda élip barghan ziyaritini axirlashturushtin burun, béyjing da'irilirining xitay - qazaqistan arisida 2 - néfit turubisi yatquzush pilanini otturigha qoyghanliqini bildürdi. Toqayéf peyshenbe küni béyjingdin ayrilish aldida qazaqistanning béyjingdiki elchixanisida xitayning siyasiy we ijtima'iy qatlimidiki erbaplargha söz qilip, bu qétimqi xitay sepiride béyjing hökümitining qazaqistan bilen xitay arisigha 2 - néfit turubisini qurush pilanini otturigha qoyghanliqini we bu pilan üstide muzakire élip barghanliqini ashkarilidi.

Toqayéfning eskertishiche, qazaqistan néfit igiliki xitay bilen hemkarliq élip baridighan muhim sahege aylinip qalghan. Xitay bilen qazaqistan arisigha ilgiri ottura qazaqistandiki atasudin alataw éghizighiche yatquzulghan néfit turubisi ötken yili 12 - ayda pütti. Toqayéfning ashkarilishiche, u xitay tashqiy ishlarministiri bilen ikki döletning uzun muddetlik hemkarliqini ilgiri sürüsh layihisining deslepki nusxisi üstide pikir birliki hasil qilghan. Lékin toqayéf, bu layihining tepsiliy détalliri we bu qétimqi sepiride yene qandaq mesililer östide muzakire élip barghanliqini tilgha almidi.

Qazaqistan xitayning shangxey guruhidiki sherqiy türkistan küchlirige qarshi turush mesiliside béyjing bilen hemkarlishidighanliqini bildürgen ittipaqdashlirining biri. Toqayéfning eskertishiche, ular 2010 - yilghiche xitay - qazaqistan arisidiki soda hejimini 10 milyard dollargha chiqirishni pilanlighan. Toqayéf, béyjingdiki ziyaritini seyshenbe küni bashlighan idi.