Қирғизистан президентиниң келиштүргүчи вәкили хитай көмүрчилик карханилирини әйиблиди


2007-10-05
Share

Қирғизистан президентиниң келиштүргүчи вәкили ‏ (омбудосман) турсунбай бақир оғли алдинқи күни қирғизистан пайтәхти бешкәк шәһиридә ахбарат елан қилиш йиғини өткүзүп, қирғизистанда мәшғулат елип бериватқан хитай мәдәнчилик карханилирини қирғизистанниң муһитини булғаш вә муһит бузғунчилиқи елип бериши сәвәбидин әйиблиди.

Қирғизистан AK прәсс ахбарат агентлиқиниң әскәртишичә, бақир оғли хитай карханилирини мәшғулат җәрянида мәсулийәтсизлик қилди вә җалалабадниң җәнубидики чатқал алтун кенини қезиш җәрянида муһит мәсилиси билән кари болмиди, дәп әйиблигән.

Турсунбай бақир оғли, йәрлик пуқраларниң шикайитигә асасән йеқинда хитай мәдәнчилик карханиси мәшғулат елип бериватқан чатқалдики алтун кенида рәсмий тәкшүрүш елип барған. Бақир оғли, чатқалдики алтун кени һөкүмәтниң рухсәтнамиси билән мәшғулат елип бериватқан болсиму, лекин йетәрлик бихәтәрлик тәдбир елинмиғанлиқини вә алтун кан үстидин лаяқәтлик тәкшүрүши елип берилмиғанлиқини билдүрди.

Униң әскәртишичә, алтун қезиш мәшғулати шу җайдики дәря - өстәңләрниң булғинишини еғирлаштуруп, ичимлик су вә су иншаатлириниң зәһәрлинишигә, дәл-дәрәх һәм гүл - гияларниң қуруп кетишигә сәвәбчи болмақта. Хитай, оттура асия дөләтлириниң ениргийә вә тәбий байлиқлар игиликигә әң көп мәбләғ селиватқан дөләтләрниң биридур. Көзәткүчиләрниң әскәртишичә, райондики дөләтләр бир тәрәптин хитайниң мәблиғи вә һәмкарлиқиға еһтияҗ болса, йәнә бир тәрәптин хитай тәсир күчиниң районда ешип бериватқанлиқидин биарам болмақта. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт