Японийә қирғизистанға актип ярдәм бериду

Өткән җүмә күни қирғизистан баш министири алмазбек атамбайев японийиниң қирғизистандики вәкили билән көрүшүп, икки дөләт арисидики сода-иқтисадий һәмкарлиқ вә сиясий мунасивәтлирини музакирә қилған. Қабар агентлиқиниң учуридин мәлум болушичә, сөһбәтниң асаслиқ темиси японийиниң қирғизистанға мәбләғ селиш мәсилилиригә қаритилған болуп, қирғизистан баш министири қирғизистанниң иқтисадий тәрәққиятида японийигә охшаш демократик тәрәққи дөләтләрниң қоллишиға муһтаҗ икәнликини билдүрүп, узун йиллардин буян японийиниң қирғизистанға қериндашларчә көрситиватқан ярдәмлиригә рәһмитини билдүргән.

японийә вәкили тусухико кахай японийиниң қирғизистанниң кона системидин йеңи системиға өтүш өткүнчи басқучини йениклитиш үчүн давамлиқ ярдәм қилидиғанлиқини, һазирму көплигән ярдәм программилириниң барлиқини тәкитлигән.

японийә билән қирғизистан арисидики һәмкарлиқ мунасивәтлири әсқәр ақайев дәвридә башланған болуп, геологийә, сода вә пән-техника алмаштуруш җәһәтләрдә бәзи қәдәмләр бесилған иди.

Сабиқ японийә баш министири койзуми мәркизий асия районини японийиниң муһим истратегийилик һәмкарлиқ пиланиға киргүзүп, район дөләтлирини мәхсус зиярәт қилған һәтта японийә даирилири оттура асия һәмкарлиқ тәшкилати билән йеқиндин һәмкарлишиш тәклиплирини оттуриға қойған иди. Қирғизистан японийиниң оттура асия сияситидә бәлгилик орун тутқан.(Үмидвар)