Yaponiye qirghizistan'gha aktip yardem béridu

Ötken jüme küni qirghizistan bash ministiri almazbék atambayéw yaponiyining qirghizistandiki wekili bilen körüshüp, ikki dölet arisidiki soda-iqtisadiy hemkarliq we siyasiy munasiwetlirini muzakire qilghan. Qabar agéntliqining uchuridin melum bolushiche, söhbetning asasliq témisi yaponiyining qirghizistan'gha meblegh sélish mesililirige qaritilghan bolup, qirghizistan bash ministiri qirghizistanning iqtisadiy tereqqiyatida yaponiyige oxshash démokratik tereqqi döletlerning qollishigha muhtaj ikenlikini bildürüp, uzun yillardin buyan yaponiyining qirghizistan'gha qérindashlarche körsitiwatqan yardemlirige rehmitini bildürgen.

Yaponiye wekili tusuxiko kaxay yaponiyining qirghizistanning kona sistémidin yéngi sistémigha ötüsh ötkünchi basquchini yéniklitish üchün dawamliq yardem qilidighanliqini, hazirmu köpligen yardem programmilirining barliqini tekitligen.

Yaponiye bilen qirghizistan arisidiki hemkarliq munasiwetliri esqer aqayéw dewride bashlan'ghan bolup, gé'ologiye, soda we pen-téxnika almashturush jehetlerde bezi qedemler bésilghan idi.

Sabiq yaponiye bash ministiri koyzumi merkiziy asiya rayonini yaponiyining muhim istratégiyilik hemkarliq pilanigha kirgüzüp, rayon döletlirini mexsus ziyaret qilghan hetta yaponiye da'iriliri ottura asiya hemkarliq teshkilati bilen yéqindin hemkarlishish tekliplirini otturigha qoyghan idi. Qirghizistan yaponiyining ottura asiya siyasitide belgilik orun tutqan.(Ümidwar)