Yawropa ittipaqi merkiziy asiya döletlirige 12 milyon dollar berdi

Yawropa ittipaqi merkiziy asiya döletlirige dawamliq iqtisadiy yardemlerni bérip kelmekte, yawropa ittipaqi yéqinda merkiziy asiya döletlirige 2008-2009-yilliri ichide chégrilirini mustehkemlep, zeherlik chékimliklerning toshulushidin saqlinishni kücheytishi üchün 12 milyon amérika dolliri bergen. Bu heqte 25-may küni yawropa ittipaqining merkiziy asiya chégriliri programmisining mes'uli xardi rélin'g resmiy bildürüsh élan qilghan.

"Bügünki qazaqistan" agéntliqining uchuridin qarighanda, xardi rélin'g kéler yili yene alte milyon dollar ajritilidighanliqini eskertken.

Yawropa ittipaqining merkiziy asiya chégriliri we zeherlik chékimliktin mudapi'e körüsh programmisining mes'ul béjirgüchisi amir elchibékof buning yawropa ittipaqining qazaqistandiki eng chong programmilirining biri ikenlikini tekitligen, uning éytishiche, qazaqistanning iqtisadi bashqa jumhuriyetlerge qarighanda, körünerlik derijide tereqqi qiliwatqanliqi sewebidin yawropa ittipaqining mezkur programmisining yardem puligha érishish nisbiti iqtisadiy tereqqiyati töwen hésablinidighan qirghizistan, tajikistan we özbékistanlargha nisbeten azraq iken.

Tehlilchilerning qarishiche, yawropa ittipaqi qatarliq gherb döletlirining neziride merkiziy asiya bolupmu afghanistan-tajikistan, afghanistan –özbékistan chégriliri zeherlik chékimlikning toshulush ötkelliri jümlidin muqimsiz rayonlardin ibaret bolup, bu jaylarda muqim weziyet yaritish yawropa ittipaqining bixeterliki bilenmu munasiwetliktur. (Ümidwar)