Xitay qirghizistan'gha shangxey guruhining yighinining bixeterlikini birlikte qoghdash teklipini berdi

Xitay saqchi da'iriliri qirghizistan saqchi da'irilirigha bu yil bishkekte ötküzülidighan shangxey hemkarliq teshkilatigha eza döletler bashliqlirining yighinining bixeterlikini qoghdashqa yardem körsitidighanliqini bildürgen.

Qirghiz xewerliri agéntliqining ashkarilighan bu heqtiki uchuridin qarighanda, 27-may küni qirghizistan ichki ishlar ministiri bolatbék noghaybayéf xitay jama'et xewpsizlik ministirliqining mu'awin ministiri méng xongwéy bashchiliqidiki bir wekiller ömikini qobul qilip, ular bilen söhbet ötküzgen.

Méng xongwéy qirghizistanliq kesipdéshining yuqiri herbiy unwan'gha érishkenlikini tebriklesh bilen birge yene özining qirghizistan ichki ishlar da'irilirining bu yil ötküzülidighan shangxey hemkarliq teshkilatining ali derijilik rehberler yighinigha munasiwetlik alghan bixeterlik tedbirlirige qiziqidighanliqi, shuningdek bundaq yighinning bixeterlikini qoghdash jehetlerdiki özara tejribilirini almashturushqa jümlidin térrorluq guruppilirini birlikte yoqitishqa teyyar ikenlikini izhar qilghan.

Qirghiz xewer agéntliqining uchurigha asaslan'ghanda , xitay wekiller ömiki xitayning qirghizistan ichki ishlar orginigha bir milyon amérika dolliri yardem béridighanliqini bildürgen bolup, xewerde éytilishiche, xitay xelq jumhuriyiti jama'et xewpsizlik ministirliqi qirghizistan qanunni qoghdash organlirining xitaygha körsitiwatqan qollashliri üchün qirghizistan ichki ishlar ministirliqigha hazirghiche töt milyon dollar yardem bergen iken. (Ümidwar)