تۈركىيە شىمالىي ئىراقتىكى PKK پارتىزانلىرىنى يەنە بومباردىمان قىلدى


2007-12-26
Share

تۈركىيە ئۇرۇش ئايرۇپىلانلىرى چارشەنبە كۈنى تۈركىيىدىن ئايرىلىپ كۇردىستان قۇرۇش مەقسىتىدە پائالىيەت ئېلىپ بېرىۋاتقان pkk مۇستەقىلچى كۈرد پارتىزانلىرىنىڭ شىمالىي ئىراقنىڭ زاپ رايونىدىكى غارلاردا قۇرۇۋالغان بازىلىرىنى يەنە بومباردىمان قىلدى.

تۈركىيە قوراللىق قىسىملىرى باش قارارگاھى تور بېتىدە ئېلان قىلغان بۇ ھەقتىكى باياناتىدا تۈركىيە ئۇرۇش ئايرۇپىلانلىرىنىڭ زاپ رايونىدىكى كۈرد پارتىزانلىرى يوشۇرۇنۇۋالغان 8 غارنى بومباردىمان قىلغانلىقىنى بىلدۈردى. بۇ تۈركىيە ھاۋا ئارمىيىسىنىڭ تۈركىيىلىك كۈرد پارتىزانلىرىنىڭ شىمالىي ئىراقتىكى بازىلىرىغا 16 - دېكابىردىن بېرى 3 - قېتىم ھاۋا ھۇجۇمى قوزغىشى بولۇپ ھېسابلىنىدۇ.

بۇنىڭدىن بۇرۇن قوزغىغان 2 قېتىملىق ھاۋا ھۇجۇمى 16 ۋە 22 - دېكابىرلاردا ئېلىپ بېرىلغان ئىدى. تۈركىيە قوراللىق قىسىملار باش قارارگاھى 16 - دېكابىردىكى ھۇجۇمدا 150 دىن 175 كىچە بولغان pkk لىقنىڭ ئۆلگەنلىكىنى ئېلان قىلغان بولسىمۇ، كۈرد پارتىزانلىرىنىڭ ئاخبارات ئورگىنى فىرات خەۋەر ئاگېنتلىقى شۇ كۈنكى ھاۋا ھۇجۇمىدا 5 ئادىمىنىڭ چىقىم بولغانلىقىنى ئىلگىرى سۈرگەن.

ياۋروپادىن تارقىتىلىدىغان pkk غا يېقىن مەتبۇئات ئورگانلىرىدىن roj tv ئىسىملىك تېلېۋىزىيە قانىلى ھۇجۇمدا شىمالىي ئىراقتىكى 15 كۈرد يېزىسىنىڭ زىيانغا ئۇچرىغانلىقىنى ۋە 2 يېزا پۇقراسىنىڭ ئۆلگەنلىكىنى بىلدۈردى. شىمالىي ئىراقتىكى ئاپتونوم ھاكىمىيىتىنىڭ رەئىسى مەسۇد بارزانى بولسا تۈرك ئۇرۇش ئايرۇپىلانلىرىنىڭ ھۇجۇمىنى ئەيىبلىگەن. تۈركىيە مەتبۇئاتلىرىنىڭ ئەسكەرتىشىچە، تۈركىيىلىك كۈرد پارتىزانلىرىنىڭ شىمالىي ئىراقتىكى بازىلىرىنى بومباردىمان قىلىش ھەرىكىتىدە ئامېرىكا تۈركىيىنى ئاخبارات بىلەن تەمىنلىگەن بولۇشى مۇمكىن.

تۈركىيىنىڭ شەرقىي جەنۇبىدىكى كۈردلەر 1984 - يىلدىن بېرى تۈركىيىدىن ئايرىلىپ مۇستەقىل دۆلەت قۇرۇش مەقسىتىدە پائالىيەت ئېلىپ بارماقتا ئىدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت