Abdullah gül türkiyining 11 - prézidénti bolup saylandi


2007-08-28
Share

Türkiyide yéngi jumhur re'isi saylap chiqildi. Saylamda adalet we tereqqiyat partiyisining namzati bolghan qeysiri parlamént ezasi, tashqi ishlar ministiri abdullah gül türkiye jumhuriyitining 11 - jumhur re'isi bolup saylandi.

Abdullah gül 339 awaz aldi

Saylam bügün chüshtin kéyin sa'et üchte élip bérilghan bolup, saylamgha jem'iy 448 parlamént ezasi qatnashti. Saylamgha qatnashqan 3 namzat ichidin abdullah gül 339 awaz aldi, milletchi heriket partiyisining namzati sabahettin chaqmaqoghli 70 awaz , démokratik sol partiyining namzati tayfun ichli bolsa 13 awaz aldi. Saylamda 24 kishi awaz bermigen bolup, ikki awaz inawetsiz bolghan.

Abdullah gülning qesimi

Abdulla gül re'is jumhuri bolup saylan'ghandin kéyin axsham sa'et 6de, türkiye parlaméntida qesem bérish murasimi ötküzüldi. Murasimgha pütün parlamént ezaliri we her sahedin kelgen wekiller shundaqla herbiyler qatnashqan bolup, abdullah gül mundaq dep qesem berdi : " jumhur re'isi bolush süpitim bilen döletning barliqi we musteqilliqini, weten we milletning parchilanmas pütünlükini, milletning shertsiz hakimiyitini qoghdaydighanliqimgha, asasiy qanun'gha, qanunning üstünlikige, démokratiyige, atatürkning idiye we inqilablirigha, jumhuriyetning pirinsiplirigha sadiq boludighanliqimgha , milletning hozur-halawiti we parawanliqi, milliy tayanch we insan heqliridin behrimen bolushigha kapaletlik qilidighanliqimgha, türkiye jumhuriyitining shan - sheripini qoghdash, yükseldürüsh we manga bérilgen wezipini terepsiz halda ijra qilidighanliqimgha, pütün küchüm bilen xizmet qilidighanliqimgha büyük türk milliti we tarix aldida qesem bérimen. "

Qesemdin kéyin türkiyining dölet marshi orunlandi. Kéyin, jumhur re'is abdullah gül teshekkur sözi qildi. Murasim ayaghlashqandin kéyin abdullah gül jumhur re'isi giribi taqalghan mashinida herbiy murasim bilen atatürkning xatire sariyigha qarap mangdi.

Bügün türkiyining herqaysi jaylirida abdullah gülning re'is jumhuri bolghanliq munasiwiti bilen tentenilik murasimlar ötküzülmekte , abdullah gülning yurti bolghan qeysiri wilayiti bolsa alliqachan bayram tentenisige chömgen idi. 10Minglarche kishi kochilargha chiqip buni tebriklidi. Bularning ichide qeysiride yashawatqan Uyghurlarmu bar . Biz qeysiridiki tebriklesh murasimi we Uyghurlarning héssiyatlirini bilish üchün ular bilen söhbet élip barduq.

Abdullah gülning qisqiche tarixi

Türkiyining 11. Nöwetlik jumhur re'isi abdullah gül 1950-yili 10-ayning 29-küni türkiyining qeysiri wilayitide dunyagha kelgen. U uniwérsitétni istanbulda püttürgendin kéyin, londonda iqtisad bölümide doktorluqta oqughan. U dokturluqini püttürgendin kéyin sakarya uniwérstétida oqutquchiliq qilishqa bashlighan. U, 1983-yilidin 1991-yilighiche merkizi se'udi erebistanning jiddi shehiridiki islam tereqqiyat bankisida mutexessis bolup ishligen. Abdullah gül siyasiy ishlargha arilashqandin kéyin , hökümet bayanatchisi we türkiy jumhuriyetlerge mes'ul dölet ministiriliq wezipilirini ijra qilghan. U, 2002-yilidiki saylamda adalet we tereqqiyat partiyisidin parlaméntqa kirip, bash ministir mu'awini we tashqi ishlar ministiri wezipilirini ötigen idi.(Erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet