Америкиниң "байқаш" намлиқ аләм кемиси аләм бошлуқида римонт қилинмақта

Америкиниң "байқаш" намлиқ аләм кемиси 2005 - йил 7 - айниң 26 - күни әтигән саәт 10 дин 39 минут өткәндә, филорида шитатидики кенниди аләм базисидин учурулған иди.

"Байқаш" намлиқ аләм кемиси йәр йүзидин пүтүн дуняниң пән - илим бойичә йеңи сирларни байқашқа болған үмид - арзулирини елип аләм бошлуқиға көтүрүлүватқанда, күтүлмигән һалда йүз бәргән бир һадисә сәвәбидин пәйда болған дуняниң ғәм -қайғусиниму, у өзи билән биллә аләм бошлуқиға елип чиқип кәткән иди.

"Байқаш" намлиқ аләм кемиси әсли пилан бойичә 8 - айниң 7 - күни аләм бошлиқидики вәзиписини тамамлап, аләм учқучилирини елип йәр шариға қайтип келиши керәк. Әмма у һазир аләм понкитида римонт қилиниватиду.

"Байқаш" ни аләм учқучилири 3 - қетим римонт қилишқа башлиди

Б б с ниң хәвәр қилишичә, әслидә 7 - айниң 13 - күни "байқаш" намлиқ аләм кемиси билән аләм понкитиға тәминат йәткүзүп бериш пиланланған иди. Шундақла, пүтүн инсанийәт униңдики йеңи үскүниләрдин аләм бошлиқида техиму йеңи сирларни байқашни үмид қилатти. Әмма "байқаш" намлиқ аләм кемисидә мәлум механикилиқ чатақ барлиқи ениқланғачқа, у вақтинчә кечиктүрүлүп, ахир 7 - айниң 26 - күни андин аләм бошлуқиға учқузулди.

Бу қетимму, "байқаш" намлиқ аләм кемиси йәр шаридин аләмгә қарап көтүрүлүш җәрянида, униңдики иссиқлиқ өтүшини тосайдиған парчилар зәмиләнгәнлики һәққидики рәсимлик учурларни, униңға орунлаштурулған 3 данә фото аппарати алимларға ениқ хәвәр қилди. Гәрчә "байқаш"ниң мәлум парчилири зәхмигән болсиму, у йәнила аләм бошлиқиға һаман саламәт йетип чиқти. Учқучиларни вә қачиланған йүкләрни аләм понкитиға йәткүзди.

Америкиниң аләм бошлуқи идариси бу қетимқи "байқаш" намлиқ аләм кемисиниң, худди 2003 - йили 2 - айда аләм бошлиқиға чиқип қайтип келиштә, иссиқлиқни тосайдиған парчилири бузулғанлиқтин пачақлинип кәткән "колумбия" намлиқ аләм кемисигә охшаш паҗиәгә учримаслиқини үмид қилатти. Һазир "байқаш" намлиқ аләм кемиси аләм учқучилири тәрипидин 3 - қетим аләмдә муәлләқ туруп римонт қилинишқа башлиди. Бундақ римонт қилиш буниңдин бурун дуняда көрүлүп бақмиған иди.

Хитай мәркизи телевизийә истансиси немә үчүн америкиниң "байқаш" намлиқ аләм кемисигә қаза тиләйду?

7 - Айниң 31 - күни "бошүн" тор бетидә "хитайниң мәркизий телевизийә истансиси немә үчүн "байқаш" намлиқ аләм кемисигә қаза тиләйду?" сәрләвһилик бир обзор елан қилинди.

7 - Айниң 27 - күни, бейҗиңдә чиқидиған "бейҗиң яшлири" , "қанун гезити" қатарлиқ учур вастилири "байқаш" парчиланмақта, "байқаш" барса кәлмәскә кәтти" дегәндәк мақалиләрни елан қилди, - дәйду бу обзорниң аптори ли чаңйү әпәнди, - бу мақалиләрдә инсанийәт мәдәнийитигә болған өчмәнлик ипадиләнгән, буниңға ләнәт оқуймән !

Америкиниң "байқаш" намлиқ аләм кемиси йәр шаридин аләмгә қарап көтүрүлгәндә, -дәйду аптор, - хитайниң мәркизий телевизийә истансисиниң бу һәқтики аңлитиши дунядики башқа телевизийә истансилириниң аңлитишидики тәләппузға түптин охшимайду. Дунядики башқа телевизийә истансилири америкиниң "байқаш" намлиқ аләм кемисиниң мувәппийәтлик болушини үмид қилса, хитайниң мәркизий телевизийә истансиси униңға қаза келишини үмид қилди. Әйни вақитта, хитай мәркизий телевизийә истансисиниң аңлитиш бөлүмидә бир аял риясәтчи билән хитайниң йәнә икки нәпәр аләм мутәхәссиси олтурған иди. Аял риясәтчи аңлитишни "җиддийлишип кәткәнликимдин, алқинимдин соғуқ тәр чиқип кәткән иди" дәп башлап, бир тинивалғандин кейин "немила болмисун, у һазир аләм бошлуқиға көтүрүлүп чиқти" дегәндин кейинла, хитайниң аләм бошлуқи мутәхәссислири сөзләшкә башлиди.

Уларниң ағзидин америкиниң "байқаш" намлиқ аләм кемисгә қарита бирәр хәйрлик сөз, апирин, мәдһийә яки үмид түси чиқмиди. Бәлки улар "байқаш" намлиқ аләм кемисидин "чәксиз әндишә" қиливатқанлиқини тәкрар - тәкрар ипадилиди. Хитай мәркизий телевизийә истансиси инсанийәтниң аләмни бой сундуруш тарихида совет иттипақида гагарин асманға чиқандин тартип, таки хитайдин яң ливей асманға чиққанғичә болған аталмиш дәвр бөлгүч кона күрүнүшләрни телевизийә икранида бир - бирләп көрситип турди. Аләм бошлуқи илмидә хитайниң техи көп арқида икәнликини ениқ билсиму, әмма уни ейтиштин баш тартиватқан хитай мутәхәссислири һеч номус қилмастин туруп, америкиниң аләм бошлуқини чүшиниш җәһәттә көрсәткән тиришчанлиқлириға вә мисли көрүлмигән дәриҗидә йеңи сирларни ачқанлиқиға һәсәт вә дүшмәнлик нәзиридә қарап, буниңдин бурун америкиниң "колумбия" намлиқ аләм кемиси һадисигә учрап пачақланған вәқәни вә бу қетимқи "байқаш" намлиқ бу аләм кемисиниң тәннәрқи наһайити юқири икәнликини тәкрар - тәкрар сөзләп турди.

- Хитай билән америка бир - биригә дүшмән дөләтләр әмәс, - дәйду аптор мулаһизисидә, - һазир урушиватқан дөләтләрму әмәс, әмма немә үчүн хитай коммунист партийисиниң зувани болған хитай мәркизий телевизийә истансиси америкиға алақидар хәвәрла болса, униңға нисбәтән шу қәдәр җиддийлишиду вә шу қәдәр дүшмәнлик билән қарап муамилә қилиду?

Америкиниң "байқаш" намлиқ аләм кемиси аләм бошлуқида римонт қилинип, вәзипилирини толуқ тамамлап йәр шариға қайтип кәлгәндин кейин, бу суаллар һәргиз җавабсиз қалмайду. (Вәли)