Америкилиқлар билән хитай коммунист партийиси бир нахшини тәң ейтамду?


2006.01.24
Share on WhatsApp
Share on WhatsApp

Америкидики 'йеңи таң телевизийә истансиси' нюйорк шәһиридә чаған байрими үчүн хитай әнәнилири бойичә сәнәт кечилики пиланлиған. Хитайниң мәркизий телевизийә истансиси болса униңға қарши һалда охшаш орун вә охшаш вақитта сәнәт кечилики өткүзүшни пиланлиған. Хитайниң мәркизий телевизийә истансиси тәйярлатқан сәнәт номурлири ичидики 'бир нахшини тәң ейтиш' дегән номур җиддий муназирә қозғиған.

Хәлқни йиргәндүргән нахша

Фалунгоң тәшкилатлири америкиниң нюйорк шәһиридики сот мәһкимисигә мәркизий телевизийә истансиси үстидин шикайәт қилип әрз сунған. "Улуқ ира гезити" дә елан қилинған хәвәрләрдә баян қилинишичә, хитай мәркизи телевизийә истансиси бу қетим нюйорк шәһиридә сәһнигә елип чиққан 'бир нахшини тәң ейтиш' дегән сәнәт номури хитайда 1990 ‏-йиллардин башлап сәһнигә елип чиқилған нахша. Хәлққә қанлиқ қирғинчилиқларни унтулдуруш вә фалунгоңчиларниң идийисини өзгәртиш үчүн тәйярлатқан нахша. Хитай һөкүмити тутқун қилған фалунгоңчиларни түрмиләрдә қийин -қистаққа елип туруп, уларни сақчилар билән бирликтә тәң ейтишқа мәҗбурлиған нахша.

Һазир нюйорк шәһиридә туруватқан сиясий мулаһизичи лин бавхуа әпәнди бу мәсилә үстидә обзор елан қилди. Лин бавхуа әпәндиниң мулаһизә қилишичә, коммунист хитай һөкүмити 1989 ‏-йили бейҗиңдики тйәнәнмен мәйданида хәлқни қанлиқ бастурғандин кейин, пүтүн дуня уни әйибләш вә һәрхил шәкил билән җазалашқа башлиған иди. Шу йилларда хитай һөкүмити хәлққә қанлиқ вәқәләрни унтулдуруш үчүн асия тәнһәрикәт мусабиқиси уюштуруп наһайити көп күч вә иқтисад сәрп қилған. 'Тәң ейтидиған бир нахша' шу вақитта сәһниләргә елип чиқилған. Бу нахшидики 'қизил гүлләр мусапимизниң шаһити' , 'бикар кәткүзмәймиз ширин чүштики пурсәтни' дегәндәк мисралардин бейҗиң шәһириниң аһалилири қаттиқ йиргәнгән иди. Чүнки хәлқ хитай коммунистик партйиисниң диктаториси астида меңип келиватқан мусапә қанға боялған мусапә, қизил гүлгә толған мусапә әмәс иди. Хәлқниң көргини ширин чүш әмәс, бәлки хәлқни худди 4 ‏- июн вәқәсидәк қара бесип туратти. Хитай коммунистик партийиси фалунгоңни бастурушқа башлиғандин кейин, тутқун қилған фалунгоңчиларни қийин - қистаққа елип туруп сақчилар билән бирликтә шу нахшини тәң ейтишқа мәҗбурлап кәлмәктә.

Хитай компартийисиниң бирликсәп сиясити

Лин бавхуа әпәндиниң мулаһизә қилишичә, буниңдин 60 нәччә йил бурун, мавзедоң йәнәндә ечилған әдәбият -сәнәт йиғинида "әдәбият‏- сәнәтни инқилаб үчүн хизмәт қилғузуп, уни хәлқни тәрбийиләп дүшмәнлиримизни йоқитидиған қоралға, йәни һәммә адәм тәң ейтидиған бир нахшиға айландуримиз" дегән. Шуниңдин кейин 'бир нахшини тәң ейтиш' хитай коммунистик партийисиниң бирликсәп сиясити болуп кәлмәктә.

Чәтәлләрдә хитай әһли өзини 'таңлиқлар' дәп атайду, худди коммунист һөкүмити тәшәббус қилғандәк 'хәнзу' дәп атимайду. Улар қурған йеңи таң телевизийә истансиси йеқинқи йиллардин буян хитайларниң қизғин алқишиға еришмәктә. Хитай мәркизи телевизийә истансисиниң бу қетимқи 'бир нахша' һәрикити униңға тақабил туруш, мав зедоңчә коммунизм тәшвиқатини йолға қоюш еһтияҗиға асасән қилинған. Демәк, һазир коммунист хитай һөкүмити америкида хитайларни, тәйвәнликләрниму хитай коммунистик партийиси билән бир нахшини тәң ейтидиған қилишқа урунмақта. (Түгиди)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт