Amérika- yaponiye bixeterlik qoshma bayanati -teywen boghuzining tinchliqi üchün


2005.02.22

Amérikining tashqi ishlar ministiri rays xanim we dölet mudapi'e ministiri ramisféld ependi yaponiyining tashqi ishlar ministiri nobutaka makimura ependi we mudapi'e ministiri yoshinori ohno ependi, 2005 - yili 2 - ayning 19 - küni, washin'gtonda amérika - yaponiye bixeterliki toghrisida meslihet ötküzüp, ikki terep birlikke kelgen mesililer buyiche qoshma bayanat élan qilghan idi.

< Bayanatning muhim noqtisi amérika bilen yaponiye ittipaq tüzüsh

Amérika bilen yaponiyidin ibaret bu ikki dölet otturisida birlikke kelgen 10 maddiliq qoshma bayanatning tuluq tékisti bésilghan "közütüsh" zhornilida bayan qilinishiche, bu qoshma bayanatning merkizi noqtisi amérika bilen yaponiye ittipaq tüzüsh, amérika bilen yaponiyining bixeterlikini we iqtisadi güllep yashnishini kapaletlendürüsh, rayon da'irilik we yer shari xaraktérliq tinchliqni we turaqliqini kuchaytishtin ibaret.

Bu qoshma bayanatta yene amérika bilen yaponiyining afghanistan, iraq qatarliq ottura sherq döletliri mesilisidiki hemkarliqining muweppiqiyetlirini tereqqi qildurush, qarshi döletlerning bashqurilidighan bomba sistémisini tosush iqtidarini ashurush, shimali koriyini shertsiz halda atom qorallirni emeldin qaldurush söhbitige élip kélip, pütün koriye yérim arilining birlikke keltürülüshini ilgiri sürüsh, xelq'araliq térrorizmni we yadro qorallarning tarilip kétishini tosush, xitayning herbiy teyyarliqini uchuq - yoruq qilish, rusiyini asiya - tinchliq okyan rayonida muhim rol oynashqa righbetlendürüsh, yaponiyini birleshken döletler teshkilati bixeterlik kéngishining da'imiy eza dölet salahitige yetküzüsh, xelq'arada térorchiliqni yiltizidin qurutush qatarliq mesililerde köz qarash birliki hasil bolghanliqi jazalan'ghan.

Kong chu'en: teywen jonggoning ayrilmas bir qismi

"Asiya maliye géziti" ning xewer qilishiche, amérika - yaponiye bixeterlik qoshma bayanatida teywen boghuzidiki jiddiylikni peseytish amérika bilen yaponiyining "ortaq istratégiyilik nishani" dep jakarlan'ghanliqigha, xitayni teywen ariligha qarita 600 dane bashqurilidighan bomba orunlashturdi, dep eyiblep, buning üchün xitayning "herbiy muddi'asi uchuq - yoruq bulushi kérek" tekitligenlikige qarita, xitay tashqi ishlar ministirlikining bayanatchisi kong chüen ependi naraziliq bildürüp "teywen xitayning ayrilmas bir qismi. 1949 - Yili, xitaydiki gomindang partiyisi ichki urushta xelqtin ayrilip qéchip bu aralni bésiwalghandin buyan, bu aral qaytidin birlikke keltürüshni kütüp turmaqta. Xitay bu bayanatta otturigha quyulghan köz qarashlargha qarshi turidu. Amérika bilen yaponiye teywen mesilisi toghrisida özliri béyjingning "bir jonggo" siyasitige qoshulup bergen wedilerge emel qilishi kérek" dégen.

Teywen'ge qaritilghan "qizil térrorluq"

"Dunya géziti" de bayan qilinishiche, béyjingning "döletning bölünishige qarshi turush" üchün tüzmekchi bolghan qanuni teywen boghuzidiki ikki terepning medeniyet almashturush asasini üzül - késil yoq qilidu. Shundaqla u , teywendiki chén shuybyen hökümitining buninggha qarshi halda "qoshiwélishqa qarshi turush qanuni" tüzüp chiqishini keltürüp chiqirishi mumkin. Béyjingning "bölünüshke qarshi turush qanuni" tüzüsh herikiti, emeliyette kommunist partiyining urush qilish hoquqini qanunlashturushni meqset qilidu, bu, teltöküs "qizil térrorluq".

Teywen'ge chéqilish -- amérika - yaponiye bixeterlik kélishimige chéqilghanliq

Teywende chiqidighan "xitay waqit géziti" de bayan qilinishiche, bu qétim amérika bilen yaponiye birliship bixeterlik mesilisi boyiche jakarlighan qoshma bayanat - xitaygha teywen'ge qarita herbiy tewekkulchilik qilishtin qol üzüsh toghrisida agahlandurush bérishni we teywen boghuzining toraqliqliqini saqlashni meqset qilidu.

Teywenning köp sanliq qanun palata ezaliri amérika bilen yaponiye birliship teywen boghuzini özining ortaq nishani qilghanliqi teywenning mepe'etige uyghun, dep qaraydu. Kommunist xitay 1996 - yili, sabiq sowét ittipaqining jendisige warsliq qilip chong herbiy meshiq élip bérip, amérika bilen yaponiyining bixeterlik kilishimini tesewwurdiki düshmen qilip nishanlighandin kéyin, 1997 - yili, amérika - yaponiye burunqi bixeterlik kishilimige qaytidin tüzütüsh kirgüzüp "teywenni öz ichige alghan etraptiki jaylarda herbiy weqe yüz berse, u amérika - yaponiye bixeterlik kilishimige qaritilghanliq bolidu" dep jakarlighan idi. Bu qétimqi amérika - yaponiye bixeterlik qoshma bayanatini yene kommunist xitayning "bölünüshke qarshi turush qanuni" tüzmekchi bolghanliqi keltürüp chiqardi. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.