Уйғур елидә, хитай өлкилиригә сәнәтчи қиз қобул қилиш еланлири барғансери көпәймәктә


2007.03.29

Йеқинда, биз уйғур елиниң йеза ‏- қишлақлиридин болупму, уйғурлар зич олтурақлашқан қәшқәр, хотән һәмдә ақсу қатарлиқ җайлардин уйғур қизлириниң түркүм ‏- түркүмләп хитайниң һәр қайси җайлиридики завут, карханиларға ишчилиққа елип кетиливатқанлиқи һәққидә аңлитишлар бәргән идуқ. Радиомизниң игилишичә, хитай өлкилиригә әкитиливатқан бу уйғур қизлири йезилардики йеши 18дин 25 яшқичә болған, той қилмиған, чирайлиқ, келишкән қизлар болуп, уларниң көп сандикиси мәҗбурий һалда елип кетилгән. Амалсиз қалған бир қисим ата ‏- анилар илаҗи йоқ техи той қилиш йешиға тошмиған қизлирини хитай өлкилиригә әвәтмәслик үчүн, тойини қиливетишкә мәҗбур болған.

"Уссулчи" қобул қилиш еланлири

Демәк һазир уйғур елидә, "деһқан әмгәк күчлирини шинҗаң сиртиға йөткәш" дегән сиясәт түпәйлидин, нурғунлиған намрат деһқан қизлири хитай өлкилиригә берип ишләшкә мәҗбур болған. Йеқинда хитай өлкисидә оқәт қилип йүргән бир уйғур яш радиомизниң һәқсиз линийисигә телефон қилип, уйғур елидики нурғунлиған қизларниң ваң лечүәнниң юрти сәндуңға апирилғанлиқини ашкарилап, өзиниң бу хил әһвалдин қаттиқ нәпрәтлинидиғанлиқини билдүрди.

Бундин икки күн илгири, радиомизниң һәқсиз линийисигә телефон қилған үрүмчидики бир уйғур яш һазир уйғур елиниң ғулҗа, хотән, ақсу, қәшқәр қатарлиқ йәрлик телевизийә истансилири хитай өлкилиригә "усулчи қиз қобул қилиш" һәққидә, тохтимай елан беридиған болуп кәткәнликини һәмдә нурғунлиған уйғур қизлириниң бундақ еланларға ишинип хитай өлкилиригә кетиватқанлиқини мәлум қилди.

Йерим ялиңач "уйғурчә уссуллар"

Радиомизниң һәқсиз линийисигә телефон қилған бу уйғур яш бир қисим уйғур қизлириниң пул үчүн һәммидин ваз кечип, хитай өлкилиригә кетиватқанлиқини тәкитләш билән бир вақитта, уларниң хитай өлкилиридә ойниған усули уйғурчә усул әмәс, бәлки уйғурчә музикиға кәлтүрүп ойниған әрәбчә йерим ялиңач усул икәнликини билдүрди.

Радиомизниң зияритини қобул қилған исмини мәлум қилишни халимиған үрүмчидики бир аял һазир һәрқайси телевизорларда "усулчи қиз" вә модел қиз елиш һәққидики еланларниң күнсери көпийип кетиватқанлиқини, уйғур қизлириниң пул үчүн һәммидин ваз кечиватқанлиқини тәкитләп, уйғур ата- анилириниң бу хил әһвалдин интайин әндишә қилидиғанлиқини билдүрди. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.