Хав феңҗүн коммунист хитай һөкүмитиниң сүйиқәстини ашкарилиди


2005.06.23

Гәрчә хитай һөкүмити йиллардин буян 610 - номурлуқ ишханиниң, йәни мәхсус фалунгуң әзалирини бастуруп, уларға сүйқәст қилидиған ишханиниң мәвҗут икәнликини инкар қилип келиватқан болсиму, мәзкур ишханиниң һәқиқәтән мәвҗутлиқи йеқинда нурғун пакитлар арқилиқ пүтүнләй ашкариланди.

Хитай ишпийонлири чәтәлдики өктичиләрни назарәт қилиду

Әйни чағда, дәл мушу ишханида ишлигән, бу йил нурғун ички материялларни елип хитайдин қечип чиқип, һазир австралийидә сиясий панаһлиқ тилигән хитайниң юқири дәриҗилик әмәлдари хав фиңҗүн йеқинда, көплигән мәтбуатларға хитай компартийисиниң мәхсус фалунгуң әзалириға сүйқәст қилиш үчүн қурған бу 610 - номурлуқ ишханисиниң барлиқ мәхпийәтликлирини шундақла хитай һөкүмитиниң та бүгүнгә қәдәр һәр йили дегидәк һәр қайси дөләтләргә миңлиған ишпийон әвәтип чәтәлләрдә яшаватқан өктичиләрни назарәт қиливатқанлиқини ашкарилиди.

Хитай җамаәт хәвпсизлик идарисиниң юқири дәриҗилик әмәлдари хав фиңҗүн өзиниң хитайдики чеғида нәнкәй университетиниң қанун факултетини пүттүрүпла дәсләптә сақчи болуп ишлигәнликини, кейин тәшкилниң буйруқи бойичә 610 - номурлуқ ишханиға берип, мәхсус фалунгуң әзалирини җазалаш хизмити билән шуғулланғанлиқини, нурғунлиған фалунгуңчиларниң униң күз алдида сақчилар тәрипидин зәхмиләндүрүлгәнликини сөзләп келип " әшу күнләр мән үчүн худди дозаққа охшаш, һәр бир ойлиғинимда бәкму ечинимән, хитай коммунистлириниң бу хил фашист қилмишлиридин қаттиқ нәпрәтлинимән" дәп билдүрди.

Хитай қануниға тоғра кәлмәйдиған 610 – номурлуқ ишхана

Хав фиңҗүнниң мәлум қилишичә, 610 - номурлуқ ишхана 1999 - йили 6 - айниң 10 - күни қурулған болуп, дәсләптә униңға " фалунгуң мәсилисини биртәрәп қилиш рәһбәрлик гурупписи" дәп нам қоюлған. Кейин коммунист хитай һөкүмити мәмликәтниң һәрқайси җайлирида " фалунгуң мәсилисини биртәрәп қилиш рәһбәрлик гуруппа ишханиси" намида көплигән тармақларни қурған. 610 - Номурлуқ ишханиниң қурулуши хитай қануниғиму тоғра кәлмигәнликтин, у пәқәт " партийә ишлири билән мунасивәтлик орун" дәп бекитилгән. Лекин мәзкур ишхана фалунгуң әзалирини бастурушта интайин зор һоқуққа игә болуп, давамлиқ өз алдиғила тәшкиллик вә пиланлиқ һалда йошурун һәрикәтләрни елип барған һәмдә бу хил һәрикәтләр һечқандақ қанун чәклимисигә учримиған.

Мәсилән: мәзкур ишханиниң һәр йили дигидәк 3000 ға йеқин фалунгуң әзасини тутуш, қамаш вә җазалаш дегәндәк вәзиписи бар болуп, хав феңҗүн қатарлиқ ишхана хадимлири бу вәзипиләрни һәр хил амаллар арқилиқ чоқум бекитилгән вақит ичидә түгитиши керәк икән.

Шү тәнгаң: хав феңҗүнниң қилғини наһайити улуқ бир һәрикәт

Радиомизниң зияритини қобул қилған, америкидики фалунгуң тәшкилатиниң баянатчиси шү тәнгаң әпәнди, австралийидә сиясий панаһлиқ тилигән коммунист хитай һөкүмитиниң юқири дәриҗилик әмәлдари хав феңҗүн вә чен юңлинларниң өз шәхси мәнпәәтини бир чәткә қайрип қоюп, хитай һөкүмитиниң әпти - бәширисини пүтүн дуняға ашкарилиғанлиқини " наһайити улуқ бир һәрикәт" дәп қарап, өзиниң булардин чоңқур миннәтдар икәнликини билдүрди.

Америкидики фалунгуң тәшкилатиниң баянатчиси шү тәнгаң әпәнди, сөһбәт җәрянида йәнә мәзкур тәшкилатниң, хав феңҗүн дәп өткән 610 - номурлуқ ишхана елип барған бу хил фалунгуң әзалирини қийнаш һәрикәтлиридин бундин илгириму аз- тола хәвәрдар икәнликини, һазир болса техиму ениқ пакитларға еришкәнликини билдүрди.

Фалунгуң тәшкилатиниң баянатчиси шү тәнгаң әпәнди, хитай һөкүмитиниң пәқәт австралийигила әмәс бәлки канада вә америка қатарлиқ нурғун дөләтләргиму ишпийон әвәтип, мәзкур дөләтләрдики өктичи вә фалунгуңчиларни қаттиқ назарәт қиливатқанлиқини һәмдә хитай һөкүмити һәрйили аҗратқан дөләт хираҗитиниң 4 тин бирини фалунгуң әзалирини бастуруш вә чәтәлләрдики өктичиләрни көзитишкә сәрп қиливатқанлиқини мәлум қилди.

Хитайдин қечип чиқип австралийидә сиясий панаһлиқ тилигән хитай һөкүмитиниң юқири дәриҗилик әмәлдари хав феңҗүн вә чен юңлинларниң дөня хәлқиғә коммунист хитайниң ички әһваллирини ашкарилиши, пәқәт австралийә һөкүмитинила әмәс бәлки пүтүн дуняни зил - зилиға кәлтүрди. Хитай һөкүмити өзиму буниңдин қаттиқ чөчигәнликтин, 610 – ишхана мәхпийәтликини ашкарилиған хав феңҗүнни " компартийигә қарши чиққан әксилинқилабчи" дәп әйиблиди. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.