Xaw féngjün kommunist xitay hökümitining süyiqestini ashkarilidi

Gerche xitay hökümiti yillardin buyan 610 - nomurluq ishxanining, yeni mexsus falun'gung ezalirini basturup, ulargha süyqest qilidighan ishxanining mewjut ikenlikini inkar qilip kéliwatqan bolsimu, mezkur ishxanining heqiqeten mewjutliqi yéqinda nurghun pakitlar arqiliq pütünley ashkarilandi.

Xitay ishpiyonliri chet'eldiki öktichilerni nazaret qilidu

Eyni chaghda, del mushu ishxanida ishligen, bu yil nurghun ichki matériyallarni élip xitaydin qéchip chiqip, hazir awstraliyide siyasiy panahliq tiligen xitayning yuqiri derijilik emeldari xaw fingjün yéqinda, köpligen metbu'atlargha xitay kompartiyisining mexsus falun'gung ezalirigha süyqest qilish üchün qurghan bu 610 - nomurluq ishxanisining barliq mexpiyetliklirini shundaqla xitay hökümitining ta bügün'ge qeder her yili dégidek her qaysi döletlerge minglighan ishpiyon ewetip chet'ellerde yashawatqan öktichilerni nazaret qiliwatqanliqini ashkarilidi.

Xitay jama'et xewpsizlik idarisining yuqiri derijilik emeldari xaw fingjün özining xitaydiki chéghida nenkey uniwérsitétining qanun fakultétini püttürüpla deslepte saqchi bolup ishligenlikini, kéyin teshkilning buyruqi boyiche 610 - nomurluq ishxanigha bérip, mexsus falun'gung ezalirini jazalash xizmiti bilen shughullan'ghanliqini, nurghunlighan falun'gungchilarning uning küz aldida saqchilar teripidin zexmilendürülgenlikini sözlep kélip " eshu künler men üchün xuddi dozaqqa oxshash, her bir oylighinimda bekmu échinimen, xitay kommunistlirining bu xil fashist qilmishliridin qattiq nepretlinimen" dep bildürdi.

Xitay qanunigha toghra kelmeydighan 610 – nomurluq ishxana

Xaw fingjünning melum qilishiche, 610 - nomurluq ishxana 1999 - yili 6 - ayning 10 - küni qurulghan bolup, deslepte uninggha " falun'gung mesilisini birterep qilish rehberlik guruppisi" dep nam qoyulghan. Kéyin kommunist xitay hökümiti memliketning herqaysi jaylirida " falun'gung mesilisini birterep qilish rehberlik guruppa ishxanisi" namida köpligen tarmaqlarni qurghan. 610 - Nomurluq ishxanining qurulushi xitay qanunighimu toghra kelmigenliktin, u peqet " partiye ishliri bilen munasiwetlik orun" dep békitilgen. Lékin mezkur ishxana falun'gung ezalirini basturushta intayin zor hoquqqa ige bolup, dawamliq öz aldighila teshkillik we pilanliq halda yoshurun heriketlerni élip barghan hemde bu xil heriketler héchqandaq qanun cheklimisige uchrimighan.

Mesilen: mezkur ishxanining her yili digidek 3000 gha yéqin falun'gung ezasini tutush, qamash we jazalash dégendek wezipisi bar bolup, xaw féngjün qatarliq ishxana xadimliri bu wezipilerni her xil amallar arqiliq choqum békitilgen waqit ichide tügitishi kérek iken.

Shü ten'gang: xaw féngjünning qilghini nahayiti uluq bir heriket

Radi'omizning ziyaritini qobul qilghan, amérikidiki falun'gung teshkilatining bayanatchisi shü ten'gang ependi, awstraliyide siyasiy panahliq tiligen kommunist xitay hökümitining yuqiri derijilik emeldari xaw féngjün we chén yunglinlarning öz shexsi menpe'etini bir chetke qayrip qoyup, xitay hökümitining epti - beshirisini pütün dunyagha ashkarilighanliqini " nahayiti uluq bir heriket" dep qarap, özining bulardin chongqur minnetdar ikenlikini bildürdi.

Amérikidiki falun'gung teshkilatining bayanatchisi shü ten'gang ependi, söhbet jeryanida yene mezkur teshkilatning, xaw féngjün dep ötken 610 - nomurluq ishxana élip barghan bu xil falun'gung ezalirini qiynash heriketliridin bundin ilgirimu az- tola xewerdar ikenlikini, hazir bolsa téximu éniq pakitlargha érishkenlikini bildürdi.

Falun'gung teshkilatining bayanatchisi shü ten'gang ependi, xitay hökümitining peqet awstraliyigila emes belki kanada we amérika qatarliq nurghun döletlergimu ishpiyon ewetip, mezkur döletlerdiki öktichi we falun'gungchilarni qattiq nazaret qiliwatqanliqini hemde xitay hökümiti heryili ajratqan dölet xirajitining 4 tin birini falun'gung ezalirini basturush we chet'ellerdiki öktichilerni közitishke serp qiliwatqanliqini melum qildi.

Xitaydin qéchip chiqip awstraliyide siyasiy panahliq tiligen xitay hökümitining yuqiri derijilik emeldari xaw féngjün we chén yunglinlarning dönya xelqighe kommunist xitayning ichki ehwallirini ashkarilishi, peqet awstraliye hökümitinila emes belki pütün dunyani zil - ziligha keltürdi. Xitay hökümiti özimu buningdin qattiq chöchigenliktin, 610 – ishxana mexpiyetlikini ashkarilighan xaw féngjünni " kompartiyige qarshi chiqqan eksil'inqilabchi" dep eyiblidi. (Méhriban)