Rusiyide fashistliq heriketler kücheymekte

Rusiye xewer agéntliqlirining uchurigha qarighanda, 1-may küni moskwa shehirige ziyaretke kelgen ikki neper aljiriye herbiy xadimi fashisitlar teripidin qattiq urup zexmilendürülgen. Rusiye xewerlirige asaslan'ghanda rusiye fashistliri asasen dégüdek qara tenlikler, qara chachliqlarni hujum nishani qilghan bolghachqa, bu xildiki ademlerning rusiye sheherliride, bolupmu moskwa we snakit pétérburgda da'im urup zexmilendürülüsh hetta öltürülüsh weqeliri yüz bérip turidiken.

Xewerlerge qarighanda hetta rusiyige xizmet bilen kelgen amérikiliq qara tenlik diplomatlarmu fashistlar teripidin zexmilendürülgen bolup, moskwaning sanliq melumatigha qarighanda 2004-yili rusiyide fashistlar teripidin bir qanche yüz qétim bashqa milletlerge hujum qilish hemde 40 ademni öltürüsh weqesi sadir qilin'ghan . Qara tenlikler, qara chachliqlarning rusiye sheherliride erkin yürelmeslik weziyiti shekillinishke yüzlen'gen.

Rusiyidiki fashistlar qandaq nerse?

Rusiyidiki intérfakis agéntliqining uchurigha qarighanda rusiyidiki fashistlar adette "aypang bashlar" depmu atalghan bolup, bu teshkilatqa eza boghanlarning hemmisi 15-18 yashlar etrapidiki chachlirini chüshürip, pak-pakiz qirdurup yüridighan rus yashlirining topidur. Intérfakisning melumatigha qarighanda hazir rusiyide 50 ming fashist bar bolup, ular on nechche fashist teshkilatigha tewe iken. Bu teshkilatlar ichide dangliqliridin " slawiyanlar ittipaqi", "weten"," xelq millet partiyisi", "erkinlik" , "rus milliy birliki" qatarliqlardur.

Chéchini chüshüriwetken fashist yashlar bir –biri bilen xuddi gitlér gérmaniyisining usuli boyiche ong qolini kötürüp," xayil gitlér", we yaki " rusiyige sherep bolsun" dep waqirishidiken.

Rusiye fashistlirining idiyisi

Rusiye analizchilirining yézishiche. Rusiyidiki bu xil fashizm emeliyette rus showinizimining yuqiri pellisi bolup, ularning idiyisi "rusiye peqet ruslar üchünla" dégendin ibaret.

Mezkur yéngi rus fashizmining neziride rusiye tupriqidiki barliq bashqa milletler yoqulushi kérek. Shu wejidin ular aldi bilen kawkazliqlargha, ottura asiyadin kelgenlerge, xitaylargha shuningdek musulmanlar we siganlargha nisbeten öchmenlik közi bilen qarap, da'im ulargha hujum qilish ehwalliri körülgen.

Xewerlerge qarighanda tajikistan musapirliri ichide bir qanche on adem ene shular teripidin öltürülgen. Bu fashistlar top-top bolushup, soda bazarlirigha kirip, u jaylardiki ottura asiyaliqlar, kawkazliqlar we bashqa rus emes kishilerge zorluq qilidighan, xilwet jaylarda ularni urup-bulaydighan ishlar da'im yüz bérip turidu.

Rus milletchiliki ziyaliylar we memurilar qatlimidimu mewjut

Rusiyide yéqindin buyan rus showinizimining küchiyip kétiwatqanliqi xelqara jemiyetning diqqitini tartqan bolup, amérika tashqi ishlar ministirlikimu bu heqte doklat teyyarlighan. Yéqinda rusiye prézidénti putin isra'iliyini ziyaret qilghanda , isra'iliye da'iriliri rusiyidiki yehudilargha qarshi kepypiyatning ewji alghanliqini bildürgen.

Xewerlerdin ashkarilinishiche, rus milletchiliki yalghuz yuqirida éytilghan bir qisim addiy yashlardila emes, belki yuqiri qatlamdimu mewjut. Ruslarda omumiy yüzlük halda sabiq sowét ittipaqidin ayrilghan hetta hazirmu rusiye teweside yashawatqan bashqa milletlerni "rusiye üchün düshmen" dep qaraydighan keypiyatlar köpeymekte. Yehudilargha qarshi turush, bashqa milletler bolupmu, asiyaliqlarni yeklesh rusiyining hemme qatlamlirigha singishke bashlighan.

Rusiye agéntliqliridin www.newsru.com Da körsitilishiche, yéqinda 20 neper parlamént ezasini öz ichige alghan 500 ataqliq erbap rusiye döletlik bash teptishige murajetname yézip, barliq diniy birlikler we yehudilarning diniy birliklirini chekleshni teshebbus qilghan. Ular xétide ashkara halda "yehudilarning dinini" eyibligen iken.

Rusiyidiki insan hoquqlirini himaye qilish teshkilatliri rusiyide küchüyiwatqan bundaq bashqa millet we irqni chetke qéqish ,uni düshmen qatarida körüshtek fashizmning rawajlinishigha yol qoyushning xeterlik ikenlikini, eger buni qattiq jazalimighanda rusiyige téximu zor balayi-apetlerni élip kélidighanliqlirini agahlandurghan. (Ümidwar)