Apette qalghan namrat xelqni ghemdin xaliy qilish qurulishi xelqni ghemge salmaqta


2005.05.27

Xitay hökümiti, 2004 - yilidin bashlap besh yil ichide Uyghur élidiki yer tewresh apitige uchrighan rayonlardiki namrat déhqanlarning bixeter öylerge köchüp kirishi üchün mexsus meblegh ajritip, yer tewreshke chidamliq öylerning qurulushini bashlighan idi. Bu besh yil ichide, namrat yéza -kentlerde jem'iy 185 ming alilikning yer tewreshke chidamliq öylerge köchüp kirishini emelge ashurush pilanlan'ghan. Nöwette, bezi yéza -nahiyilerde bir qisim öyler pütüp, yer tewreshte öysiz qalghan bezi déhqanlar yéngi öylerge köchüp kirishke bashlighan.

Emma, Uyghur aptonum rayonluq hökümetning bu xizmetke mes'ul orunlirining yéqinda tekshürüsh élip bérishiche, her qaysi namrat yézilarda séliniwatqan bu chidamliq öylerning 201 i ölchemsiz bolup chiqqan bolup, bu öylerni pütünley buzup bashqidin yasashqa 3 milyard yu'en kétidiken.

Üchturpanda séliniwatqan 80 öy ölchemsiz bolghanliqi üchün örüwétildi

Aqsu xewer toridin ashkarilinishiche, üchturpan nahiyiside séliniwatqan yer tewreshke chidamliq bixeter öyler dep élip bériliwatqan qurulush jeryanida, qurulush orunlirining xiyanetchiliki tüpeyli jem'iy 80 öy ölchemsiz qurulush bolup chiqqan, shundaqla aqsu wilayitining walisi jarulla hisamidin bu öyler üstidin tekshürüsh élip bérip, hemmini chéqip qayta sélishqa buyrighan.

Bu yil ikkinchi ayning otturida, üchturpan nahiyisi 6.2 Bal yer tewresh apitige uchrap, nurghun öyler örülüp, ikki yüzdin artuq ademning ölüshini keltürüp chiqarghan idi. Apet éghir bolghan jaylardiki köp sandiki amma öysiz qalghan, beziliri hazirgha qeder kepe hem chidirlarda daldilanmaqta.

Uyghur éli hökümiti hem aqsu da'iriliri üchturpandiki apette qalghan amminng bu yil 5 - ayghiche bixeter öylerge köchüp kirishini emelge ashurushni pilanlighan bolsimu, emma aqsu hökümet toridiki xewerdin ashkarilinishiche, pilandiki jem'iy 11613 öyning hazirgha qeder pütkini aran 17٪ kimu yetmigen.

Bixeter öy qurulushlirining ölchemsiz bolishi qurulush shirketlirining mes'uliyiti

Biz xitay merkiziy hökümiti hem Uyghur aptonum rayonluq xelq hökümitidin mexsus meblegh ajritip qurulush élip bériwatqan namrat rayonlarning yer tewreshke chidamliq bixeter öy qurulushining ehwallirini igilesh üchün, üchturpan nahiyilik hökümetke téléfon qilduq. Nahiyilik partkom sékritari ziyaritimizni qobul qilip bixeter öy qurulushining qandaq élip bériliwatqanliqini tonushturdi. U mundaq dédi:

"Biz apette öysiz qalghan déhqanlargha bixeter öy sélish qurulishini 3 - ayning 15 - küni bashlighan. Ikkinchi ayda yer tewrigende nahiyimizde jem'iy ikki ming 400 din köp a'ililikning öyi örülgen. Hazirgha qeder beziliri yene kepilerde turiwatidu, az bir qismi yéngi öylerge köchüp kirdi".

Muxbirimiz: Bilishimizche mushu ayning axirighiche, barliq déhqanlarning yéngi öylerge köchüp kirishini pilanlighan ikensiler, hazir ayning axiri bolup qaldi qurulushunglar téxi tamam bolmidimu?

Partkom sékritari: Birinchi pilandiki öylerning qurulushini bu ayning axiri pütturimiz. Hemmini tamamlash mumkin emes, pilanning bir qismidiki yeni 163 a'ililik yéngi öylerge köchüp kireleydu..

Muxbirimiz: Bu chidamliq öylerning qurulushini qaysi qurulush orunliri élip bériwatidu?

Partkom sékritari: Bir qismi sirttin kelgen shexsi qurulush shirketliri yene beziliri nahiyimizning qurulush tarmaqliri. Her bir öyning qurulushigha dölet texminen 10 ming yu'endin meblegh ajratqan.

Muxbirimiz: Aqsu wilayetlik hökümettin igilishimizche, nahiyide séliniwatqan bu bixeter öy qurulushining bir qismi ölchemsiz xeterlik öyler bolup chiqiptu, buning sewebi néme?

Partkom sékritari: He, bir nechche kün burun, jarulla wali tekshürüshke keptiken, bir qisim öyler ölchemsiz chiqti. Ularning hemmini buzup, qaytidin yasaymiz.. Chünki ularning beziliri qurulush dawamida qurulush matiriyallirini kam ishlitip süpetsiz matériyallarni ishlitip süpetsiz qurulush élip barghan. Bu mes'uliyetni dogwargha asasen, shu qurulushni kötire alghan shirketler öz üstige élishi kérek. Ular asasen shexsi qurulush shirketliri. Hökümet xelqni bixeter öyge kirgüzimiz dep élip bériwatqan qurulush eksiche, xeterlik bolup chiqsa bolamdu? bu qurulushlarni ötküziwilishqa mexsus kadirlarni ajrattuq, biz undaq ölchemsiz öylerni buzup qayta salimiz.

Apettiki namrat xelq bixeter öylerge köchüp kirish üchün chiqim tartmaqta

Biz yene, üchturpan nahiyisidiki apetke eng éghir uchrighan imamlirim yézisigha téléfon urup, ammining bixeter öy qurulush ehwallirini soriduq. Ziyaritimizni qobul qilghan bir Uyghur déhqan, bu yézida qurulush élip bériliwatqan bezi öylerning ölchemge toshmay qaytidin séliniwatqanliqini , yéziliq hökümetning apetke uchrighan namrat déhqanlarning yéngi öylerge köchüp kirishi üchün ulardin jiq heq éliwatqanliqini pash qildi.

Gerche xitay merkiziy hökümiti hemde Uyghur aptonum rayonluq hökümet namrat rayonlarning yer tewreshke chidamliq öy qurulushigha yardem bérish üchün, mexsus meblegh ajratqan bolsimu, ammini ghem endishidin xaliy qilish meqset qilin'ghan bu qurulush, yéza - kentlerdiki munasiwetlik emeldarlar üchün pul ündürüsh, parixorluq qilish pursiti yaritip bergen bolup, apet rayonidiki bezi déhqanlar, qurulush jeryanida parixorlarning, dölet chüshürgen mebleghdin bashqa namrat xelqtimu menpe'et ündürmekchi boliwatqanliqini inkas qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.