"Голландийидә көкбайрақ ғәлибә қилди"


2007-10-22
Share

Kok-bayraq-200.jpg
Көк байрақ. UAA Photo

Йеқинқи икки йилдин бери, хитай һөкүмити, мәдәнийәт алмаштуруш нами астида, уйғур сәнәткарлирини чәтәлләрдә болупму явропа сәһнилиридә, оюн қоюшқа тәшкилләватиду. Әмма һәр қетимлиқ оюнда, сәһнидә, уйғур сәнити көрситилгини билән сәһнә арқисида, ай юлтузлуқ көкбайрақ билән бәш юлтузлуқ қизил байрақ өз ‏- ара тоқунушиватиду. Бу йил өктәбирниң 18 ‏-, 19 ‏-, вә 20 ‏- күнлири голландийидиму әйни әһвал юз бәрди.

Уйғур сәнити қоғдалған әмәс, аман қалған сәнәт

Хитай даирилири, уйғур сәнитини җуңхуа сәнитиниң бир парчиси дәп қарайду, уйғур тәшкилатлири болса, уйғур сәнитини өз алдиға айрим мустәқил бир миллий сәнәт дәп қарайду.Хитай даирилири, уйғур сәнитини, хитай коммунист һакимийитиниң пәрвиши астида қоғдиливатқан сәнәт дәп қарайду, уйғур тәшкилатлири болса, уйғур сәнитини, хитайниң сияисй боран ‏- чапқунлиридин аман қалған сәнәт дәп қарайду. Хитай даирилири, уйғур сәнитини тәрәққи қиливатқан сәнәт дәп чүшәндүриду, уйғур тәшкилатлири болса, уйғур сәнитини мәвҗутлуқини қоғдаш үчүн күрәш қиливатқан бир сәнәт дәп чүшәндүриду.

Мана бу сәвәбтин һәр қетимлиқ оюн хитай әлчиханилири билән, уйғур тәшкилатлирини җиддий һәрикәткә кәлтүриду. Хитай тәрәп уйғур сәнитини сәһнигә елип чиқиш арқилиқ, өзлириниң аз санлиқ милләт сияситидә мәсилә йоқ икәнликини, уйғурларниң нөвәттики хитай сияситидин мәмнун икәнликини билдүрмәкчи болиду вә бу арқилиқ, чәтәлләрдә күчийип бериватқан уйғур паалийәтчилирини инкар қилмақчи болиду вә олимпикниң алдида образини түзмәкчи болиду. Уйғур тәшкилатлири болса,хитайни бу мәқситигә йәткүзмәслик үчүн һәрикәт қилиду.

"Оюн қоюшни қарши алимиз, сахтипәзликкә қарши туримиз"

Голландийә шәрқи туркистан вәхпиниң башлиқи бәхтияр шәмшидин, " уйғур сәнитиниң, дуня сәһнилиридә тонуштурулуши биз алқишлайдиған бир паалийәт " дәйду, " әмма, уйғур сәнитиниң дуняда тонуштурулуши чоқум тоғра вә реал болуши керәк" дәп әскәртиду.

У йәнә " уйғур сәнити тонуштурулғанда, тамашибинлар чоқум, уйғур сәнити туғулған земинниң нами шәрқи түркистан икәнликини, бу сәнәтниң игилири болған хәлқниң бүгүн хитай асаритидә яшаватқанлиқи, зулум астида яшаватқанлиқини билиши керәк, ундақ болмиғанда, у оюн тонуштурулуватқан уйғур миллитиниң әмәс, тонуштурғучи хитай миллитиниң мәнпәәти үчүн хизмәт қилип қалиду" дәп изаһат бериду.

" Шәрқи түркистан" нами елан тахтисида

Бу нөвәт голландийидә көрситилгән уйғур сәнити долан муқами болуп, оюнни долан ансамбили орунлиған.

Ансамбил голландийигә йетип келиш билән голландийә шәрқи түркистан вәхпи, оюн қоюлидиған тиятирхана мәсули билән көрүшүп уйғур сәнити вә уйғурлар һәққидә чүшәндүрүш бәргән вә бу қетимқи қоюлидиған оюнда хитай тәрәп йәтмәкчи болған мәқсәтни ипадилигән.

Нөвәттә уйғурларниң хитай тәрәп билдүрмәкчи болғинидәк, бәхт - саадәт ичидә әмәс, бәлки еғир зулум ичидә яшаватқанлиқини пакитлар арқилиқ көрсәткән. Әһвалдин хәвәр тапқан тиятирхана башлиқи, голландийә шәрқи туркистан вәхпиниң, оюн җәрянида, тамашибинларни уйғурларниң нөвәттики реал әһвалини тонуштуруш паалийити билән шуғуллинишиға қошулған вә оюнниң еланиға шәрқи туркистан дегән намни йезишқа мақул болған.

Көкбайрақ сәһнидә

Оюн қоюлған күни 20 гә йеқин уйғур тәшкилати әзаси, қоллирида көкбайрақ көтүрүп, тиятирхана алдиға йиғилған вә тамашибинларға шәрқи түркистанниң нөвәттики вәзийитини чүшәндүргән тәшвиқат варақлирини тарқатқан. Оюнни тамаша қилиш вә көзитиш үчүн кәлгән хитай әлчихана хадимлири, уйғур паалийәтчилириниң һәрикитидин қаттиқ нарази болған, улар алақидар орунлар билән көрүшүп дипломатик күчигә тайинип туруп, көкбайрақниң тиятирхана ичигә киришини чәклигән.

Бу әһвални алдин пәрәз қилишқан паалийәтчиләр, оюн мәйданиға," шәрқи түркистан" вә" шәрқи түркистанға һөрийәт" дегән хәтләр йезилған майкиларни кийип кирип, сәһнигә чиқип уйғур артислири билән биллә усул ойнап, ай юлтузлуқ көкбайрақни сәһнигә елип чиққан.

Бу мәнзиридин һаяҗанланған тамашибинлар, уйғур паалийәтчиләрдин уйғурлар вә шәрқи түркистан һәққидә көпләп соаллар сориған. Бу қетимқи паалийәтниң тәшкиллигүчиси, голландийә шәрқи түркистан вәхпиниң башлиғи бәхтияр шәмшидин, бу паалийәт тоғрисида тәпсили чушәндүрүш бериду.

Уйғур тәшкилатлири, нөвәттә дуня әң җиддий билиши керәк болғини, уйғур сиясий вәзийити дәп қарайду вә шуңа уйғур сәнитини тонуштуруш уйғур сиясий вәзийитини йошуруш ролини ойнимаслиқи керәк дәп һәркәт қилиду. (Шөһрәт һошур)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт