Héytkah meschitining sabiq imami harunxan hajimning hayatigha oxshimighan bahalar bérildi

• Muxbirimiz gülchéhrening bu heqtiki toluq melumati
• Download story audio

Oqughuchilar, ürümchidiki islam inistitutidiki xitay dölet bayriqi ésilghan bir sinipta telim almaqta. AFP

Xitay hökümitining islam diniy muritlirigha wetenperwerlik ülgisi süpitide körsitip kelgen, héytgah meschitining sabiq imami harunxan hajim, 24 - april 84 yéshida qaza qilghan. Xitay hökümiti uning xitay hökümiti we partiyisige bolghan sadiqliqi, xitay hökümitining Uyghur élida diniy siyasitini yürgüzishide körsetken xizmetliri heqqide mexsus teshwiq wereqlirini teyyarlap, uning namaz hem nezir murasimlirida teshwiq qilghan.

Xitay hökümiti qeshqer wilayetlik hökümetning uchur torida harunxanning hayatigha baha élan qilghan. Uningda harunxan hajimning 1978 - yilidin buyan aptonum rayonluq siyasiy kéngeshning ezasi ikenliki, uning yene bir qanche nöwet aptonum rayonda hemde qeshqer wilayitide islam jem'iyitining re'islik xizmetlirini ishligenliki shundaqla 1998 - yili hemde 2002 - yili xitay islam jem'iyitidimu mudirlik wezipilirini ishligenliki tilgha élin'ghan we uning 50 nechche yil Uyghur élide diniy sahede xizmet qilish jeryanida, Uyghur xelqige xitay kompartiysining siyaset, qanunlirini teshwiq qilip, bashqa diniy zatlarnimu partiyining diniy siyasiti boyiche xizmet qilishqa yétekligenliki hemde milletler ittipaqliqini, xitayning birlikini saqlash üchün milliy bölgünchilerge qarshi turushta, muqimliqni saqlashta nahayiti chong rol oynighanliqi yézilghan.

Xitay hökümitining Uyghurlargha qaratqan siyasetlirini diniy sorunlarda, meschit jamilerde aktipliq bilen teshwiq qiliwatqan harunxan hajimning yigirme nechche yérige, namelum kishiler teripidin 1996 -yili 5 – ayning 12 - küni pichaq sélinidu, hemde uning bir quliqi késilidu. Emma uning jéni xitay hökümitining jiddi qutquzishi bilen aman qalidu. Bu weqeni keltürüp chiqarghuchi nurmemet, abdulla seypulla qatarliqlar qolgha élinip, xitay hökümiti teripidin milliy bölgünchi, térrorchi dep eyiplinip ölüm jazasigha buyrulidu. Shundin étibaren harunxan hajim xitay metbu'atlirida "milliy bölgünchilikke qarshi turghuchi, wetenning birlikini qoghdighuchi, wetenperwer diniy zat" dep teriplinip, xitay hökümitining diniy hem siyasiy teshwiqatning obyéktigha aylinidu.