Özbékistan öktichilirining amérika herbiy bazisi heqqidiki inkasliri

• Muxbirimiz ümidwarning bu heqtiki programmisi
• Download story audio

Ötken hepte özbékistan da'iriliri amérikining qarshi-xan abadtiki herbiy bazisini taqashni, alte ay ichide u jaydiki eskerliri we herbiy eslihelirini yötkep chiqip kétishni resmi telep qildi. Bu munasiwet bilen amérika mu'awin tashqi ishlar ministiri nikolas özining özbékistan'gha qilmaqchi bolghan ziyaritini bikar qildi.

Buningdin ilgiri amérika dölet mudapi'e ministiri donald ramsféld qirghizistan we tajikistanni ziyaret qilghanda u, eger özbékistanning xan abadtiki herbiy bazini ishletmeslikni telep qilsa, amérikining öz qoshunlirini élip chiqip kétishke teyyar ikenlikini bildürgen idi. Démek, 13-maydiki enjandiki qirghinchiliqtin kéyin washin'gton bilen tashkentning munasiwetliri soghuqlishishqa qarap yüzlen'gen bolup, amérikining islam kérimofni démokratik islahat élip bérishqa dewet qilip, uning enjanda ishletken qattiq qolluqini tenqid qilishi shuningdek enjan weqesining heqiqi ehwali heqqide mexsus xelqaraliq tekshürüsh élip bérishni telep qilishi islam kérimofning öz pozitsiyisini özgertip, xitay we rusiye bilen bolghan hemkarliqini kücheytken idi. U , xitay bilen rusiyining qoynigha özini atqan hemde amérikini öz eskerlirini élip chiqip kétishni telep qilghan idi.

Islam kérimofning amérika herbiy bazisini taqashni resmi telep qilip, uninggha 6 ayliq möhlet élan qilishi kérimof tüzimidin narazi bolup, chet'ellerge chiqip ketken özbékistanliqlarning inkaslirini qozghidi.

Özbékistan parlaméntining sabiq ezasi, prézidént kérimofqa bir mehel meslihetchilik qilghan , hazir amérikining wirgini'a shitatida yashaydighan jahan'gir memetop ependimu ziyaritimizni qobul qilip, özige xas bolghan inkaslirini otturigha qoydi.

Uning qarishiche, amérikining öz qoshunlirini élip chiqip kétishi özbék xelqi üchün zor yoqitish, chünki buning bilen bu jayda diktaturuluq tüzüm téximu küchiyishi mumkin. Kérimof amérikining herbiy bazisini taqashni xelqning telep qilghanliqi dep chüshendüriwatidu, emma bu pütünley yalghan bolup, emeliyette xelq uni xalimaydu. Kérimof bu qétim rusiye bilen xitayning arqa tereptin qollishi bilen özige ziyanliq bir oyun oynidi. Emma , u bu oyunda utturdi.

Amérikining qarshi xan abadtiki herbiy bazisi 2001-yili afghanistandiki talibanlargha qarshi urush bashlan'ghanda tesis qilin'ghan bolup, u jayda afghanistandiki urushqa yardem béridighan bir qisim amérika ayropilanliri we 800 neper etrapida qoshuni bar idi.