Ху җинтав өзигә йеңи образ яратмақчи (1)


2005-09-01
Share

Шинхуа агентлиқи 8 - айниң 30 - күни тарқатқан хәвәрдә баян қилинишичә, хитайниң дөләт рәиси ху җинтав 9 - айниң 5 - күнидин 17 - күнигичә болған арилиқта америка, канада вә мексикиларда дөләт ишлири бойичә зиярәттә болиду.

Ақсарайдики бир вах чүшлүк ғиза

"Волт стрит гезити"дә баян қилинишичә, ху җинтавниң америкиға қилидиған зияритиниң дәриҗиси мәсилисидә, хитай тәрәп әң юқири дәриҗидә болушни тәләп қилған. Әмма ақсарайниң баянатчиси трент дуффи әпәнди 8 - айниң ахирида "биз ху җинтавниң зияритини дөләт ишлири зиярити әмәс, бәлки пәқәт ақсарайдики бир вах чүшлүк ғиза дәп қараймиз" дәп ениқлима бәргән.

Хәвәрдә ейтилишичә, америкида дөләт рәһбәрлирини қарши елишниң әң юқири шәкли һәрбий паратни қобул қилиш, һөкүмәт әзалири билән ғизада биллә болуш, чүшлүк дөләт зияпити, ахбарат йиғини, ақсарайдики кәчлик көңүл ечиш зияпити, ақсарайдики булер меһманханисида 3 кечә қонуш қатарлиқлардин ибарәт болсиму, әмма ғәрб дипломатлири адәттә, президентниң шәхсий дачисида меһман болуп сөһбәт өткүзүшни әң алий дәриҗә дәп қарайду. Чүнки бундақ шәкилдә сөһбәтлишиш бир - икки саәт әмәс, бәлки 7 - 8 саәт болуши мумкин.

Америка әмәлдарлириниң ейтишичә, ху җинтав бу қетим ақсарайда өткүзилидиған рәсмий кәчлик зияпәт билән президентниң шәхсий дачисида меһман болуштин ибарәт әң юқири дәриҗилик икки хил шәкилниң һечқайсиға еришәлмигән.У пәқәт ақсарайда өткүзүлидиған бир вах чүшлүк ғиза қатарлиқларғила қатнишидикән, халас.

Әмәлийитигә бап кәлмигән баянат

Б б с ниң хәвәр қилишичә, хитайниң рәиси ху җинтав америкини зиярәт қилиш алдида турғанда, хитай һөкүмити 9 - айниң 1 - күни, һәрбий һазирлиқларни тизгинләш, әскәр қисқартиш, ядро қораллириниң сиртқа кеңийишидин сақлиниш үчүн тиришидиғанлиқи һәққидә ақ ташлиқ китаб елан қилиған. Хитай һөкүмити бу ақ ташлиқ китабта, хитай тунҗи болуп ядро қораллирини ишләтмәйду, хитай хәлқара мунасивәтләрдә мәңгу зомигәр болмайду, хитайниң нишани ядро қораллирини үзүл - кесил йоқ қилиш, дәп җакарлиған. Гәрчә хитай һазир дуня бойичә әскири әң көп, һәрбий хираҗәтлирини һәдәп көпәйтиватқан, ядро қорал техникисини башқа дөләтләргә кеңәйткән, һәрбий генераллири атом уруши қилишни тәкитләватқан, тәйвәнни нишанлап 700 данә башқурилидиған бомба орунлаштуруп қойған дөләт болсиму.

"юмшақ көрүнидиған қаттиқ қол" коммунист

"Асия вақит гезити" дә баян қилинишичә, ху җинтав өзиниң һәқиқий образини дуняға ашкара қилмай хитай коммунист партийиси мәркизий комитетиға бекинип туриватқили хели көп йиллар болуп қалди.

Ху җинтав 2004 - йили 4 - айда, хитайниң муавин рәиси сүпитидә америкини зиярәт қилғанда, чәтәл ахбарат тармақлири "ху җинтав дегән ким?" дегән темида һәрхил мақалиләрни елан қилған болсиму, әмма уларниң һечқайси, болупму бир қәдәр салмақ ахбаратлар ху җинтавға техичә муәййән баһа елан қилғини йоқ. Тоғрисини ейтқанда, чәтәл ахбаратлири бир нәччә йилдин буян ху җинтавни чүшиниватиду. Уларниң хатирисидә ху җинтав 2003 - йили сарс кесәллики мәсилисини биртәрәп қилишта, алди билән җаң земин бәлгиләп қойған хитайниң сәһийә министири җаң венкаңни вәзипидин қалдурған. "Дөләтниң парчилинишқа қарши туруш қануни" ни чиқирип, тәйвәнгә қаттиқ бесим ишләткән. Ху җинтав хитайниң ички сиясити җәһәттә "инақ җәмийәт қуруш", "тинч һалда көтүрүлүш" дегән уқумларни оттуриға чиқарған. Чәтәл ахбаратлири ху җинтавни мушу уқумларға асасән әмәс, бәлки 2004 - йили 1 - айда франсийә парламентида қилған сөзидә "сиясий түзүлмә ислаһати елип бериш арқилиқ сотсиялизим түзүмини мукәммәлләштүрүш" дәп тәкитлигән пакитларға асасән, ху җинтав хитайда демократик ислаһатни илгири сүридиған киши әмәс, бәлкли "юмшақ көрүнидиған қаттиқ қол" коммунист дәп қарайду.

Ху җинтав өзиниң йеңичә образини тиклимәкчи

Ахбаратларниң қаришичә, - дәп баян қилиниду "асия вақит гезити" дә, - һазир ху җинтав өзиниң йеңичә образини тикләш үчүн 1 - дин, америка яқтуридиған, сиясий җәһәттә тоғра болуп көрүнидиған қияпәтни сақлиши мумкин.

Дең шавпиң америкиға кәлгәндә падичи қалпиқини кәйгән. У шу арқилиқ америкилиқларниң яқтуришини қолға кәлтүргән. Униңдин 20 йил өткән бүгүнки күндә, америка -хитай мунасивити худди президент буш ейтқандәк "наһайити мурәккәп" һалда турмақта. Бу чағда ху җинтавниң америкиға қандақ образ билән көрүнүши наһайити муһим. 2 - Дин, ху җинтав чәтәлләрдә яхши образ тиклийәлисә, у ниң дөләт ичидики имтиязи күчийиду. Хитайниң илгирики 3 әвлад рәһбири мав зедоң, дең шавпиң, җаң земинләр америка билән муамилә қилиш җәрянида, һеч болмиғанда берәрдин чоң ишни қиливалған. 4 - Әвлад дәп аталған ху җинтав, гәрчә у дөләт ичидә гуаңҗуда базарға чиқип кишиләр билән параңлашқан, бейҗиңниң йенидики хебей өлкисигә берип деһқанлар билән биллә җувава йегән шундақ иш излири билән, дөләт ичидә тәшвиқ қилинип "хәлқпәрвәр" дәп образ тиклигән болсиму,, әмди униң хәлқарадики образи немә болиду? мустәбитликкә варслиқ қилғучиму яки демократийә вә әркинликни арзу қилғучиму? бу наһайити муһим су бөлгүч. (Давами бар)(вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт