Xu jintaw özige yéngi obraz yaratmaqchi (1)


2005-09-01
Share

Shinxu'a agéntliqi 8 - ayning 30 - küni tarqatqan xewerde bayan qilinishiche, xitayning dölet re'isi xu jintaw 9 - ayning 5 - künidin 17 - künigiche bolghan ariliqta amérika, kanada we méksikilarda dölet ishliri boyiche ziyarette bolidu.

Aqsaraydiki bir wax chüshlük ghiza

"Wolt strit géziti"de bayan qilinishiche, xu jintawning amérikigha qilidighan ziyaritining derijisi mesiliside, xitay terep eng yuqiri derijide bolushni telep qilghan. Emma aqsarayning bayanatchisi trént duffi ependi 8 - ayning axirida "biz xu jintawning ziyaritini dölet ishliri ziyariti emes, belki peqet aqsaraydiki bir wax chüshlük ghiza dep qaraymiz" dep éniqlima bergen.

Xewerde éytilishiche, amérikida dölet rehberlirini qarshi élishning eng yuqiri shekli herbiy paratni qobul qilish, hökümet ezaliri bilen ghizada bille bolush, chüshlük dölet ziyapiti, axbarat yighini, aqsaraydiki kechlik köngül échish ziyapiti, aqsaraydiki bulér méhmanxanisida 3 kéche qonush qatarliqlardin ibaret bolsimu, emma gherb diplomatliri adette, prézidéntning shexsiy dachisida méhman bolup söhbet ötküzüshni eng aliy derije dep qaraydu. Chünki bundaq shekilde söhbetlishish bir - ikki sa'et emes, belki 7 - 8 sa'et bolushi mumkin.

Amérika emeldarlirining éytishiche, xu jintaw bu qétim aqsarayda ötküzilidighan resmiy kechlik ziyapet bilen prézidéntning shexsiy dachisida méhman bolushtin ibaret eng yuqiri derijilik ikki xil shekilning héchqaysigha érishelmigen.U peqet aqsarayda ötküzülidighan bir wax chüshlük ghiza qatarliqlarghila qatnishidiken, xalas.

Emeliyitige bap kelmigen bayanat

B b s ning xewer qilishiche, xitayning re'isi xu jintaw amérikini ziyaret qilish aldida turghanda, xitay hökümiti 9 - ayning 1 - küni, herbiy hazirliqlarni tizginlesh, esker qisqartish, yadro qorallirining sirtqa kéngiyishidin saqlinish üchün tirishidighanliqi heqqide aq tashliq kitab élan qilighan. Xitay hökümiti bu aq tashliq kitabta, xitay tunji bolup yadro qorallirini ishletmeydu, xitay xelq'ara munasiwetlerde menggu zomiger bolmaydu, xitayning nishani yadro qorallirini üzül - késil yoq qilish, dep jakarlighan. Gerche xitay hazir dunya boyiche eskiri eng köp, herbiy xirajetlirini hedep köpeytiwatqan, yadro qoral téxnikisini bashqa döletlerge kéngeytken, herbiy généralliri atom urushi qilishni tekitlewatqan, teywenni nishanlap 700 dane bashqurilidighan bomba orunlashturup qoyghan dölet bolsimu.

"Yumshaq körünidighan qattiq qol" kommunist

"Asiya waqit géziti" de bayan qilinishiche, xu jintaw özining heqiqiy obrazini dunyagha ashkara qilmay xitay kommunist partiyisi merkiziy komitétigha békinip turiwatqili xéli köp yillar bolup qaldi.

Xu jintaw 2004 - yili 4 - ayda, xitayning mu'awin re'isi süpitide amérikini ziyaret qilghanda, chet'el axbarat tarmaqliri "xu jintaw dégen kim?" dégen témida herxil maqalilerni élan qilghan bolsimu, emma ularning héchqaysi, bolupmu bir qeder salmaq axbaratlar xu jintawgha téxiche mu'eyyen baha élan qilghini yoq. Toghrisini éytqanda, chet'el axbaratliri bir nechche yildin buyan xu jintawni chüshiniwatidu. Ularning xatiriside xu jintaw 2003 - yili sars késelliki mesilisini birterep qilishta, aldi bilen jang zémin belgilep qoyghan xitayning sehiye ministiri jang wénkangni wezipidin qaldurghan. "Döletning parchilinishqa qarshi turush qanuni" ni chiqirip, teywen'ge qattiq bésim ishletken. Xu jintaw xitayning ichki siyasiti jehette "inaq jem'iyet qurush", "tinch halda kötürülüsh" dégen uqumlarni otturigha chiqarghan. Chet'el axbaratliri xu jintawni mushu uqumlargha asasen emes, belki 2004 - yili 1 - ayda fransiye parlaméntida qilghan sözide "siyasiy tüzülme islahati élip bérish arqiliq sotsiyalizim tüzümini mukemmelleshtürüsh" dep tekitligen pakitlargha asasen, xu jintaw xitayda démokratik islahatni ilgiri süridighan kishi emes, belkli "yumshaq körünidighan qattiq qol" kommunist dep qaraydu.

Xu jintaw özining yéngiche obrazini tiklimekchi

Axbaratlarning qarishiche, - dep bayan qilinidu "asiya waqit géziti" de, - hazir xu jintaw özining yéngiche obrazini tiklesh üchün 1 - din, amérika yaqturidighan, siyasiy jehette toghra bolup körünidighan qiyapetni saqlishi mumkin.

Déng shawping amérikigha kelgende padichi qalpiqini keygen. U shu arqiliq amérikiliqlarning yaqturishini qolgha keltürgen. Uningdin 20 yil ötken bügünki künde, amérika -xitay munasiwiti xuddi prézidént bush éytqandek "nahayiti murekkep" halda turmaqta. Bu chaghda xu jintawning amérikigha qandaq obraz bilen körünüshi nahayiti muhim. 2 - Din, xu jintaw chet'ellerde yaxshi obraz tikliyelise, u ning dölet ichidiki imtiyazi küchiyidu. Xitayning ilgiriki 3 ewlad rehbiri maw zédong, déng shawping, jang zéminler amérika bilen mu'amile qilish jeryanida, héch bolmighanda bérerdin chong ishni qiliwalghan. 4 - Ewlad dep atalghan xu jintaw, gerche u dölet ichide gu'angjuda bazargha chiqip kishiler bilen paranglashqan, béyjingning yénidiki xébéy ölkisige bérip déhqanlar bilen bille juwawa yégen shundaq ish izliri bilen, dölet ichide teshwiq qilinip "xelqperwer" dep obraz tikligen bolsimu,, emdi uning xelq'aradiki obrazi néme bolidu? mustebitlikke warsliq qilghuchimu yaki démokratiye we erkinlikni arzu qilghuchimu? bu nahayiti muhim su bölgüch. (Dawami bar)(weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet