Partiye ezalirining ilgharliqini saqlash herikitining nishani yenila muqimliqni saqlash

• Muxbirimiz gülchéhrening bu heqtiki melumati
• Download story audio

Nöwette xitay miqyasida partiye ezalirining ilgharliqini saqlash herikitining 3 - basquchluq xizmiti élip bérilmaqta. Shundaqla xitay kompartiyisining bu nöwettiki herikiti yéza‏- kentlerdiki partiye qurulushini mustehkemleshni obyékt qilghan. Gerche xu jintaw, mezkur heriketning asasiy qatlamlardiki partiye ezalirining sewiyisini östürüp, zamaniwi déhqanchiliqni,tereqqiyatni kücheytish dégen prinsipta élip bérilidighanliqini tekitlewatqan bolsimu, emma chet'ellerdiki xitay démokratliri we xitay kompartiyisige qarshi pikirdikiler "partiye ezalirining ilgharliqini saqlash herikiti" xitay kompartiyisining bultur ewj alghan partiye ezalirining partiyidin chékinish dolqunigha qarshi élip bériwatqan siyasiy herikiti, bu jeryanda xitay kompartiyisi, partiye ezalirini her türlük imtiyazlargha ige qilip saqlap qélishning hem bu arqiliq partiye ezasi bolushqa righbetlendürüsh taktikisini ishletmekte. Dep baha bermekte.

Uyghur élining yéza‏- kentliride bolsa bu heriket yenila xitay kompartiyisining ilgiri élip barghan siyasiy heriketlirige oxshashla "asasiy qatlamdiki partiye kadirlirini terbiyileshni kücheytip yéza‏- kentlerning muqimliqini qoghdash " dégen meqsette élip bérilmaqta.

Uyghur élining metbu'atlirida yéqindin béri élan qiliniwatqan xewerlerdin melumki, 3- basquchluq partiye ezalirining ilgharliqini saqlash herikiti bashlinishi bilen Uyghur aptonom rayonining wang léchu'en bashliq partiye‏- hökümet kadirliri bes-bes bilen her qaysi yéza‏- kentlergiche chüshüp, ilgharliqni saqlash herikitini kücheytish heqqide pa'aliyetler élip barmaqta. Shundaqla ular barghan yéza‏- kentliride partiye ezalirini, ilghar kadirlirini alahide yoqlap, mukapatlap ularni Uyghur yéza kentlirining muqimliqini saqlashta yenimu aktip xizmet qilishqa righbetlendürgen. (Gülchéhre)