Җорҗ буш 9 ‏- ноябир дуня әркинлик күнини хатирилиди

2007-11-09
Елхәт
Пикир
Share
Принт

Америка президенти җорҗ бруш, түнүгүн баянат елан қилип, 9 ‏-ноябир дуня әркинлик күнини тәбриклиди; у баянатида, дунядики барлиқ дөләтләрни, инсанларниң әркинликини боғудиған зораван сиясәтни өзгәртишкә чақирди.

Җорҗ буш: " хәлқ тарихниң еқимни өзгәртәләйду"

Бушниң тәбрикнамисидә мундақ дейилгән 1989 ‏- йили 9 ‏- ноябир күни германийидики берлин теми йиқилған, бу йиқилиш совит импириялизминиң йимирилишидин хәвәр бәргән һәм оттура вә шәрқи явропада әркинлик дәвриниң башланғанлиқидин сигнал бәргән иди. Күтүлгинидәк, бу әлләрдә, ахири, хәлқ, диктаторлар үстидин ғәлибә қилди; әркин яшаш, әркин пикир қилиш, әркин ибадәт қилиш вә һәқиқәтни өз әвладлириға тоғра йәткүзүш имканиға еришти. Мана бу роһи үстүнлүкниң, җасарәтниң, шәхсләрдики қәһриманлиқниң, тарихниң еқимини өзгәртәләйдиғанлиқиниң испати.

Дуняда техи әркинлик үчүн күрәшниң давамлишиватқанлиқини әскәртип өткән җорҗ бруш, диктатор дөләтләргә хитап қилип мундақ дәйду: америка әркинлик вә демократийини қоллаш сияситидә давамлиқ чиң туриду; диктатор дөләтләр, өз тәвәликидики хәлқләргә ишиниши, өз вәтәндашлириниң әркинликигә йол қоюши вә өктичи һәрикәтләрни бастурушини тохтитиши керәк.

Әркинликни қоллаш америка әнәниси

Америка 1776 ‏-йили 7 ‏-айниң 4 ‏- күни әнгилийә мустәмликисидин қутулуп, мустәқиллиқ елан қилған, шуңа 4 ‏-июл күнини мустәқиллиқ күни қилип бекиткән,; 1865 ‏- йили 2 ‏-айда, қуллуқ түзүмини бикар қилған, шуңа 5 ‏- феврал күнини, миллий әркинлик күни қилип бекиткән. 1989 ‏-Йили берлин теми йиқилип шәрқи германийә билән ғәрби германийә бирлишиши билән коммунизимниң чөкүши башлинип дуняда 20 дин артуқ милләт әркинликкә еришкән, шуңа җорҗ буш 2001 ‏- йили, 9 ‏- ноябир күнини дуня әркинлик күни қилип бекиткән; йәттә йилдин бери америка 9 ‏-ноябир һарписида, баянат елан қилип, америка дөлитиниң әркинлик үчүн күрәш қилғучиларни қоллаш мәйданини тәкрарлап кәлмәктә.

Уйғур сиясий паалийәтчилиридин аблимит турсунниң америкиниң әркинликни қоғдаш мәйданиниң уйғур сиясий паалийитигә тутқан позитсийидә қандақ әкс етиватқанлиқи һәққидики пикрини оттуриға қойди.

Аблимит турсун: " америка уйғурларни қоллаватиду"

Аблимит турсун: "җорҗ бушниң, 9 ‏- ноябир дуня әркинлик күни хатириләш баянатида тәкитләп келиватқан әркинлик күрәшлирини қоллаш мәйдани, америкиниң уйғур сиясий паалийитигә тутқан позитсийидә толуқ әкс әтти дийишкә болиду; бу вәзийәт мундақ үч ишта гәвдилик ипадиләнди: биринчи, уйғур миллий һәрикитиниң йетәкчиси рабийә қадир ханимниң хитай түрмисидин қутулдуруп елип чиқилиши; иккинчи, җорҗ бушниң бу йил прагада рабийә қадир ханим қобул қилип, униң паалийәтлиригә йүксәк баһа бериши; учини, америка дөләт мәҗлисидә, рабийә қадир ханимниң пәрзәнтлири вә канада вәтәндиши һөсәйин җелилни қоюветишини тәләп қилиш лайиһиси оттуриға қоюлуп мақуллиниши. Буниңдин башқа гуантанамо түрмисидики уйғур мәһбусларни хитайниң қайтуруп әкетиш тәлипиниң рәт қилиниши."

Америка президенти җорҗ буш бир ай илгири бирләшкән дөләтләр тәшкилатиниң 62 ‏- нөвәтлик омуми йиғинида сөз қилип әркинлик мәсилиси үстидә алаһидә тохталған иди. У, шу қетимқи нутиқида, мәдәний бир дөләт, әркинликни чәткә қақмайду, башқа милләтләр үстидин зораванлиқ қилмайду дәп әскәрткән вә нутқиниң ахирида йәнә, америка дунядики әркинлик күрәшлиригә вә ярдәм бериду, йетәкчилик қилиду, америка дөлити мана мушуниң үчүн мәвҗут дегән иди. (Шөһрәт һошур)

Пикирләр (0)
Share
Толуқ бәт