Némichün mawzédungning erwahi téxiche egiydu? (2)

'Béyjing yashliri' gézitining xewirige qarighanda, xitayda mawzédung ölgenlikige 30 yil toshqan küni, béyjingdiki büyük xelq sariyida chong hejimlik naxsha-muzika kéchiliki ötküzülgen. Bu muzika kéchiliki qoralliq saqchi qisim sen'et ömiki teshkilligen bir nechche yüz naxshichi mawni medhiyileydighan xor éytishi bilen bashlan'ghan. Mawzédunggha chongqur muhebbiti bar artislar qatarida Uyghurlardin kérem abdigul ependimu 'mawjushining sözliri qelbimizde saqlaqliq' dégen naxshini orunlighan. 'Közitish zhurnili'da élan qilin'ghan mulahizilerde "mawzédungning erwahi xitayda téxiche egip yürüshi, maw xitay kommunistik partiyisi üchün yétishtürüp qoyghan mirasxorlarning herxil waste qollinip kommunizm teshwiqatini toxtatmay kéliwatqanliqi bilen munasiwetlik" dep bayan qilindi. Mushu künde yene, chet'ellerdiki intérnét tor betliride mexsus mawzédung heqqide chong erkin munazire bashlandi:

Mawzédung dewri qizil térrorluq sijil dawamlashqan dewr

Amérikidin b b s ning 'maw zédong heqqide erkin munazire' bétige yézilghan bir obzorda "xitay kommunistik partiyisining 'nadanlashturush' teshwiqatida éytilghan 'qizil qoyash nurigha chömgen dewr' dégen emeliyette tarixtiki eng zulmetlik, dölet urush qalaymiqanchiliqi, xelq qizil térrorluq ichide qalghan, tarixtiki eng chong jallat hökümranliq qilghan dewr" dep bayan qilin'ghan.

Maw zédong ölgen waqitta junggo nahayiti namrat idi

Béyjingdin yézilghan bir obzorda "men peqet mawzédung ölgendin kéyinki dewrni bilimen, mining közüm körgini ‏-‏-‏- maw zédong ölgen waqitta junggo nahayiti namrat idi, démokratiye, erkinlik yoq idi. Shu waqitta, mawzédungning burun xelqqe bergen wediliri, uning kommunizm qurimiz dégini emelge ashmighan idi. Uningdin burunqi dewrni mining közüm körmidi, mawzédungning qandaq uluq, shereplik ishlarni qilghanliqining pakitini bilmeymen" dep bayan qilin'ghan.

Aldi bilen özimizni nadanliqtin azad qilishimiz lazim kanadadin yézilghan bir obzorda mundaq dep bayan qilinidu: mawzédung özi gerche 'kapitalizmning ajizlarni yem qilishigha qarshi turush' dégen sözni aghzidin chüshürmey tekitlep kelgen bolsimu, emma özi 'xelqni nadanlashturush' siyasitini qollinip, ajiz xelqlerni bihush qilip, ularni ita'etmen bolushqa mejburlap kelgen idi. Bu bir paji'e. Dunyada tereqqi qilghan döletlerning jem'iyetni tereqqi qildurush prinsipi pütün jem'iyetni qanun bilen idare qilidighan muhit yaritishtin ibaret. Bundaq muhitta, gerche yenila bezi yétishsizlik bolsimu, emma ajiz xelqler yenila küchlükler bilen teng barawer turup riqabetke qatnishalaydu. Bu tebi'etning tereqqiyat qanuniyitige uyghun shekil. Emma mawzédung dewride undaq bolmidi. Hazir biz maw dewri alliqachan bir tarixqa aylinip bolghan dewrde yashawatimiz. Hazir biz uninggha xuddi chin shixu'anggha, chinggizxan'gha baha bergendek baha bérimiz. Biz ulargha birkimning dégen gépi boyiche emes, peqet neq pakitlargha asasen baha bérimiz. Eger biz neq pakitlargha hürmet qilsaqla, biz özimizning qanchilik nadanlashturulghanliqimizni hés qilalaymiz. Jem'iyetning tereqqiyati peqet her bir kishi özining turmushini we tepekkurini erkin dawamlashturidighan qanun -tüzüm shara'itida andin emelge ashidu. Shunglashqa biz aldi bilen özimizni özimiz nadanliqtin azad qilishimiz lazim , shundaq qilghanda andin insaniyet alimidiki erkinliktin , kishilik iptixari dégendin özimiz behriman bolalaymiz.

Maw térrorchiliqqa tayinip hakimiyet bashqurghan eng chong mustebit

Shangxeydin yézilghan bir obzorda mundaq dep bayan qilinidu: maw bilen tarixta ötken bashqa birnechche kishini sélishturup köridighan bolsaq, mesilen, sün jungsen ependi u uzun ömür körelmidi. U ölgende , özi qozghighan inqilab téxi ghelibe qilmighan idi. Uning ishlirini dawamlashturghan jang keyshi héli -mikri jehette mawgha teng kélelmidi. Hetta biz hazir uluq adem dewatqan déng shawpingmu peqet maw ölgende andin qeddini kötürelidi. Pakitlargha qarighanda, maw xitay tarixida térrorchiliqqa tayinip hakimiyet bashqurghan eng chong mustebit. Bezi kishiler mawni bilimlik dep maxtisimu, emma maw emeliyette pen-ilimni bilidighan adem emes idi. Shunglashqa dunyada birer dölet shu zamanda , mawzédungni yaki mawzédung rehberlik qilghan 'junggo' dégen döletni bir normal dölet qatarida körgen emes. Pakit shuki, mawzédung bir milyardtin artuq xelqni iqtisadiy jehette namratliqqa patquzup qoydi. Nechche on milyonlighan ademni acharchiliqta qaldurup öltürdi. Milyonlighan bilimlik ademni eqil -parasitidin we erkin tepekkuridin mehrum qildi. Xitaydiki en'eniwiy medeniyet we exlaq ölchemlirini buzdi. Mawzédungning 'eger lushün hazir hayat bolsa yaki aghzini yumghan bolatti yaki türmige tashlinatti' dégenlikimu ésimizde. Hazirqi zamanda bundaq mustebitning erwahini chaqirmasliq kérek. (Dawami bar) (weli)