Xitay hökümiti,memuriy orunlarni partiye gézit-zhornallirini mushteri bolushqa mejburlimaqta

Xitay hökümitige qarashliq tengritagh tor bétining düshenbe küni bergen xewiridin ashkarilinishiche, Uyghur aptonum rayonluq kompartiye teshwiqat bölümi ötken jüme küni xitay kompartiyisining gézit- zhornallirigha mushteri bolmighan aptonum rayon derijilik memuriy organlardin 61 ige nazaret uqturushi chüshürgen.

Ghelite wezipe

Xewerde, bir qisim orunlarning kiler yilliq partiye gézit- zhornallirigha mushteri bolmighanliqini tenqid qilinip," Uyghur aptunum rayunluq partkom teshwiqat bölümi mushteri toplash wezipisini orundimighan orunlargha nazaret uqturushi chüshürüp, ulardin mushteri bolush xizmitini tézdin toluqlap yaxshi ishleshni telep qildi" dep körsitilgen.

Xitay da'iriliri xewiride yene, xitay kompartiyisining gézit-zhornallirigha mushteri bolmighan orunlarning bu yilning axiri bérilidighan meniwi medeniyet mukapat puli alalmaydighanliqini bildürgen. Hemde uqturushni tapshurup élipmu yene mushteri bolmighan idare - organlarni axbarat wastiliride uqturush qilip jazalaydighanliqini agahlandurghan.

Uyghur aptonum rayonluq partkom teshwiqat bölümining memuriy idarilerge partiye gézit- zhornallirini mejburiy téngishi heqqide tepsiliy melumat igilesh üchün, Uyghur aptonum rayonluq partiye komitéti teshwiqat bölümi bilen alaqilashtuq. Biraq téléfonni alghan bir nöwetchi xadim, özining bu ehwallardin xewersiz ikenlikini bildürüp, etisi etigen bashqa alaqidar emeldarlargha téléfon qilishimizni soridi.

Xitayning meqsiti bashqa

Xitay weziyitini yéqindin közitiwatqan, amérikining nyo-york shehiridiki musteqil obzorchi saw changching ependi, Uyghur aptonum rayonluq partkom teshwiqat bölümining memuriy organlarni partiye organ gézitige mushteri bolushqa mejburlishining hazirqi weziyette intayin ejeplinerlik ish ikenlikini bildürüp, mundaq didi:

- Méningche , ilgiri xitayda partiye gézit- zhornallirigha mejburiy mushteri bolush ehwalliri éghir idi. Emma yéqinqi yillardin buyan bu xil ehwallar azayghan. Xitaydiki metbu'at sahesi barghansiri bazarlishiwatidu. Hazir xitayning ichkiri ölkiliridiki hökümetlermu partiye gézit-zhornallirigha mejburiy mushteri bolushni anche qollimaydu. Bundaq shara'itta, Uyghur élide organlarni partiye gézit- zhornallirigha mushteri bolushqa mejburlashta méningche bashqa meqset -muddi'alar bar. Bu bir tereptin, Uyghur élidiki xitaylashchilashturush ma'aripini kücheytishning bir qismi bolsa, yene bir tereptin, özining siyasiy hakimiyitini mustehkemleshning bir wasitisi bolushi mumkin. Ular partiye gézit- zhornalliri arqiliq teshwiqatni kücheytip, Uyghur élidiki siyasiy hakimiyitini kücheytishke urun'ghan bolushi mumkin.

Xitay da'irilirining xewer qilishiche, Uyghur élide 61 aptonum rayon derijilik memuriy orun hazirghiche xitay kompartiyisining gézit- zhornallirigha mushteri bolmighan.

Xelqning rayi

Musteqil obzorchi saw changching ependi, bu xil hadisining Uyghur élidiki xelqlerningla emes, belki pütün xitaydiki puqralarning partiye gézit- zhornallirini qarshi almaydighanliqini körsitidighanliqini tekitlep, mundaq didi:

- Hazirqi xitaydiki weziyet maw zédong dewridikige oxshimaydu. Xitayda asasen metbu'at baziri shekillendi. Her xil gézit- zhornallar yéngidin chiqiwatidu. Kündilik gézit digen gézitlerdinla hazir xitayda ikki mingdin artuqi bar. Shunga, riqabet xéli küchlük. Bundaq shara'itta, kishilerning ilgirikige qarighanda nurghun tallash imkaniyiti bar. "Xelq kündilik géziti" qatarliq partiye gézitlirining mezmunliri we shekli jelip qilarliq bolmighachqa, kishiler uninggha mushteri bolushni xalimaydu. Bundaq köp orunning partiye gézit- zhornallirigha mushteri bolmighanliqimu, kishilerning uni yaxshi körmigenlikide. Hichqandaq ehmiyiti yoq nersige bikar pul xejligisi kelmigen gep. Shonga bu, kishilerning partiye gézit- zhornallirini qubul qilmasliq keypiyatlirining küchiyiwatqanliqini körsitidu. (Arzu)