Хитай коммунистик партийисидин чекингәнләр бир милйондин ашти


2005.04.22

Бултур йил ахиридин башлап америкида нәшр қилинидиған "улуғ ира" гезитидә "хитай компартийисигә 9 баһа" кәйни - кәйнидин елан қилиниш билән биллә, хитай коммунистик партийисиниң йиллардин буян өз хәлқиғә селиватқан зулумлири бир - бирләп паш қилинған.

Хитай компартийисидин чекингәнликини қоллайдиған кәң көләмлик намайиш

Шуниң билән миңлиған - йүз миңлиған хитай компартийә әзалири мәзкур партийидин чекинишкә башлиған. "Улуғ ира" гезитидә берилгән санлиқ мәлуматларда көрситилишичә, һазир хитай компартийисидин чекингәнләрниң сани бир милйондин ешип кәткән . 23 - Вә 24 -април күнлири, америка, австралийә, әнгилийә, японийә, тәйвән вә хоңкоң қатарлиқ дөләтләрдә кәң көләмлик намайишлар өткүзүп, техиму көплигән кишиләрни хитай компартийисидин чекинип чиқишға чақирмақчи болди .

23 - Април күни америкиниң нйо-йорк шәһиридә миң кишилик мәдәт бериш йиғини ечилип, милйон кишиниң хитай компартийисидин чекингәнликини қоллайдиған кәң көләмлик намайиш өткүзүлмәкчи .

Нйо-йоркта нәшир қилиниватқан "бейҗиң баһари жорнили" ниң тәһрири, хитай демократи шө вей әпәнди нйо-йоркта өткүзилидиған бу кәң көләмлик намайиш һәққидә тохтилип мундақ деди:

" 23 - Април күни нйо-йорк қатарлиқ шәһәрләрдә өткүзүлидиған бу намайишлар милйонлиған хәлқниң хитайда коммунистик партийини йоқ қилип, балдуррақ демократийә, вә әркинликниң әмәлгә ешишини үмид қиливатқанлиқини көрситип бериду. Бу қетим өткүзүлидиған намайишқа дунядики 121 тәшкилат қатнишидиған болуп, нйо-йорктики намайишқа қатнишидиған кишиләр сани 5000 әтрапида мөлчәрләнмәктә . 23 - Април күни мәнхатун мәйданидин башлап бирләшкән дөләтләр тәшкилатиниң алдиғичә намайиш болиду, нйо-йорктин башқа йәнә, 24 - април күни лондун, сидни, тәй бей, токйо қатарлиқ шәһәрләрдиму охшаш характерлик намайишлар елип берилиду"

Узунға қалмай хитайда чоң бир өзгириш йүз бериду

Шө вей әпәнди сөһбәт җәрянида : һазир хитайниң ичи вә сиртида, интернет арқилиқ шундақла телефон, факс, хәт арқилиқ америкидики ” хәлқара партийидин чекиниш мәркизи“ билән алақилишип, партийидин чекинидиғанлар саниниң күндин - күнгә көпийиватқанлиқини тәкитләп, " шуни алдин көривелишқа болидуки, узунға қалмай хитайда чоң бир өзгириш йүз берип, хитай компартийиси чоқум гумран болиду, коммунизмму хитайда чоқум үзүл - кесил аяқлишиду. " Дәп көрсәтти .

19 - Април күни америкиниң пайтәхти вашингтонда ечилған "хитай компартийисигә 9 баһа" муһакимә йиғинида, "улуғ ира гезити" ниң енглиз тили тәһрири доктор кали әпәнди "хитай компартийисигә 9 баһа" елан қилиниши биләнла бир милйон кишиниң партийидин чекингәнликини көргән коммунист хитай қаттиқ әндишидә қалған . Шуңа улар дәрһал 'партийиниң илғарлиқини сақлап қелиш' һәрикитини қозғап, партийә кадирлири вә партийә әзалириниң башқидин қәсәм беришини тәләп қилмақта" дәп көрсәтти.

Партийә әзаси болуш, бәкму нумус бир иш

Америка "әркинлик сарийи" ниң муавин рәиси марк палмер (MARK PALMER) әпәнди " гәрчә хитайниң партийә вә дөләт рәһбәрлири алмашқан болсиму, хитай компартийисиниң хәлқни езиш маһийити өзгәрмиди . Улар йәнила халиғанчә адәм тутуп, өктичиләрни қийин - қистаққа елип, кишиләрниң идийисини қаттиқ контрол қилип кәлмәктә" дәп көрсәтти. У мундақ деди:

" Хитайда һазир мухбир, язғучи, оқуғучи, динийзат қатарлиқларниң нурғуни зинданда болуп, қийин -қистаққа елинмақта. Бейҗиң һөкүмити һазир хоңкоң хәлқиниму әркин сайлам елип бериштин чәклиди. Улар һәтта интернет тор бәтлириниму интайин қаттиқ контрол қилип, һәқиқәтни һәр заман хәлқтин йошуруп кәлмәктә . Биз хитай һөкүмитиниң бу хил зораван һөкүмранлиқини дуняниң башқа җайлиридики йәрлик демократик еқимлар билән селиштурғинимизда, буниңдики пәрқниң қанчилик чоң икәнликини наһайити асанла көрүвалалаймиз. "

Вашингтондики хитай үчур мәркизиниң баш тәһрири, хитай демократи ву хуңда әпәнди " һазир хитайда партийигә киришкә илтимас қилғанларниң һәммиси дегидәк өз шәхсий мәнпәәти үчүн. Чүнки хитайда әгәр сиз, партийә әзаси болмисиңиз һечқандақ ишни әмәлгә ашуралмайсиз. яхши хизмәткә еришиш үчүн яки башлиқ болуш үчүн чоқум партийә әзаси болишиңиз керәк. Лекин һазирқи партийә әзалириниң һечқайсида бурунқидәк коммунизимға ишинидиған әһвал йоқ, улар өз шәхсий мәнпәәти үчүнла бу тәшкилатқа әза боливатиду" дәп көрситип, " мәнчә кишиләрниң ойғунудиған пәйти йетип кәлди, партийә әзаси болуш, бәкму нумус бир иш, чүнки партийә әзаси болди дегәнлик, җинайәт өткүзүватқан бир гуруһниң әзаси болди дегәнлик, хитай компартийиси 50 нәччә йилдин буян дөләт вә хәлққә нурғун вәйранчилиқларни елип кәлди, хәлқ буни чоқум тонуп йетиши керәк" дәп билдүрди :

Коммунизимниң хитайда узунға қалмай йоқ болидиғанлиқини хитай һөкүмити өзиму чоңқур һес қилип йәтти

Америкидики "әркинлик тәтқиқат фонди җәмийити" ниң рәиси доктор җек әпәнди компартийә рәһбәрлики астидики хитайда бай вә кәмбәғәлләр оттурисидики пәрқниң күнсери чоңийиши техиму көплигән кишиләрниң партийә вә һөкүмәткә болған наразилиқини һәссиләп өрлитиватқанлиқини мисалға елип, коммунизимниң хитайда узунға қалмай йоқ болидиғанлиқини һәмдә буни хитай һөкүмити өзиму чоңқур һес қилип йәткәнликини көрсәтти.

Доктор җек әпәнди сөзидә, хитай һөкүмитиниң һазир өз хәлқиниң коммунизимға етиқад қилиштин ваз кәчкәнликини чүшүнүп йәткәнликини, шуңа улар, хәлқниң қозғилип җәмийәттә қалаймиқанчилиқ чиқиришидин әнсирәп, хәлқниң вәтәнпәрвәрлик һессиятини йәнә бир қетим қозғитиштин башқа һечқандақ амалиниң қалмиғанлиқини көрсәтти. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.