Xitay kommunistik partiyisidin chékin'genler bir milyondin ashti


2005.04.22

Bultur yil axiridin bashlap amérikida neshr qilinidighan "ulugh ira" gézitide "xitay kompartiyisige 9 baha" keyni - keynidin élan qilinish bilen bille, xitay kommunistik partiyisining yillardin buyan öz xelqighe séliwatqan zulumliri bir - birlep pash qilin'ghan.

Xitay kompartiyisidin chékin'genlikini qollaydighan keng kölemlik namayish

Shuning bilen minglighan - yüz minglighan xitay kompartiye ezaliri mezkur partiyidin chékinishke bashlighan. "Ulugh ira" gézitide bérilgen sanliq melumatlarda körsitilishiche, hazir xitay kompartiyisidin chékin'genlerning sani bir milyondin éship ketken . 23 - We 24 -april künliri, amérika, awstraliye, en'giliye, yaponiye, teywen we xongkong qatarliq döletlerde keng kölemlik namayishlar ötküzüp, téximu köpligen kishilerni xitay kompartiyisidin chékinip chiqishgha chaqirmaqchi boldi .

23 - April küni amérikining nyo-york shehiride ming kishilik medet bérish yighini échilip, milyon kishining xitay kompartiyisidin chékin'genlikini qollaydighan keng kölemlik namayish ötküzülmekchi .

Nyo-yorkta neshir qiliniwatqan "béyjing bahari zhornili" ning tehriri, xitay démokrati shö wéy ependi nyo-yorkta ötküzilidighan bu keng kölemlik namayish heqqide toxtilip mundaq dédi:

" 23 - April küni nyo-york qatarliq sheherlerde ötküzülidighan bu namayishlar milyonlighan xelqning xitayda kommunistik partiyini yoq qilip, baldurraq démokratiye, we erkinlikning emelge éshishini ümid qiliwatqanliqini körsitip béridu. Bu qétim ötküzülidighan namayishqa dunyadiki 121 teshkilat qatnishidighan bolup, nyo-yorktiki namayishqa qatnishidighan kishiler sani 5000 etrapida mölcherlenmekte . 23 - April küni menxatun meydanidin bashlap birleshken döletler teshkilatining aldighiche namayish bolidu, nyo-yorktin bashqa yene, 24 - april küni londun, sidni, tey béy, tokyo qatarliq sheherlerdimu oxshash xaraktérlik namayishlar élip bérilidu"

Uzun'gha qalmay xitayda chong bir özgirish yüz béridu

Shö wéy ependi söhbet jeryanida : hazir xitayning ichi we sirtida, intérnét arqiliq shundaqla téléfon, faks, xet arqiliq amérikidiki ” xelq'ara partiyidin chékinish merkizi“ Bilen alaqiliship, partiyidin chékinidighanlar sanining kündin - kün'ge köpiyiwatqanliqini tekitlep, " shuni aldin köriwélishqa boliduki, uzun'gha qalmay xitayda chong bir özgirish yüz bérip, xitay kompartiyisi choqum gumran bolidu, kommunizmmu xitayda choqum üzül - késil ayaqlishidu. " Dep körsetti .

19 - April küni amérikining paytexti washin'gtonda échilghan "xitay kompartiyisige 9 baha" muhakime yighinida, "ulugh ira géziti" ning én'gliz tili tehriri doktor kali ependi "xitay kompartiyisige 9 baha" élan qilinishi bilenla bir milyon kishining partiyidin chékin'genlikini körgen kommunist xitay qattiq endishide qalghan . Shunga ular derhal 'partiyining ilgharliqini saqlap qélish' herikitini qozghap, partiye kadirliri we partiye ezalirining bashqidin qesem bérishini telep qilmaqta" dep körsetti.

Partiye ezasi bolush, bekmu numus bir ish

Amérika "erkinlik sariyi" ning mu'awin re'isi mark palmér (MARK PALMER) ependi " gerche xitayning partiye we dölet rehberliri almashqan bolsimu, xitay kompartiyisining xelqni ézish mahiyiti özgermidi . Ular yenila xalighanche adem tutup, öktichilerni qiyin - qistaqqa élip, kishilerning idiyisini qattiq kontrol qilip kelmekte" dep körsetti. U mundaq dédi:

" Xitayda hazir muxbir, yazghuchi, oqughuchi, diniyzat qatarliqlarning nurghuni zindanda bolup, qiyin -qistaqqa élinmaqta. Béyjing hökümiti hazir xongkong xelqinimu erkin saylam élip bérishtin cheklidi. Ular hetta intérnét tor betlirinimu intayin qattiq kontrol qilip, heqiqetni her zaman xelqtin yoshurup kelmekte . Biz xitay hökümitining bu xil zorawan hökümranliqini dunyaning bashqa jayliridiki yerlik démokratik éqimlar bilen sélishturghinimizda, buningdiki perqning qanchilik chong ikenlikini nahayiti asanla körüwalalaymiz. "

Washin'gtondiki xitay üchur merkizining bash tehriri, xitay démokrati wu xungda ependi " hazir xitayda partiyige kirishke iltimas qilghanlarning hemmisi dégidek öz shexsiy menpe'eti üchün. Chünki xitayda eger siz, partiye ezasi bolmisingiz héchqandaq ishni emelge ashuralmaysiz. Yaxshi xizmetke érishish üchün yaki bashliq bolush üchün choqum partiye ezasi bolishingiz kérek. Lékin hazirqi partiye ezalirining héchqaysida burunqidek kommunizimgha ishinidighan ehwal yoq, ular öz shexsiy menpe'eti üchünla bu teshkilatqa eza boliwatidu" dep körsitip, " menche kishilerning oyghunudighan peyti yétip keldi, partiye ezasi bolush, bekmu numus bir ish, chünki partiye ezasi boldi dégenlik, jinayet ötküzüwatqan bir guruhning ezasi boldi dégenlik, xitay kompartiyisi 50 nechche yildin buyan dölet we xelqqe nurghun weyranchiliqlarni élip keldi, xelq buni choqum tonup yétishi kérek" dep bildürdi :

Kommunizimning xitayda uzun'gha qalmay yoq bolidighanliqini xitay hökümiti özimu chongqur hés qilip yetti

Amérikidiki "erkinlik tetqiqat fondi jemiyiti" ning re'isi doktor jék ependi kompartiye rehberliki astidiki xitayda bay we kembegheller otturisidiki perqning künséri chongiyishi téximu köpligen kishilerning partiye we hökümetke bolghan naraziliqini hessilep örlitiwatqanliqini misalgha élip, kommunizimning xitayda uzun'gha qalmay yoq bolidighanliqini hemde buni xitay hökümiti özimu chongqur hés qilip yetkenlikini körsetti.

Doktor jék ependi sözide, xitay hökümitining hazir öz xelqining kommunizimgha étiqad qilishtin waz kechkenlikini chüshünüp yetkenlikini, shunga ular, xelqning qozghilip jem'iyette qalaymiqanchiliq chiqirishidin ensirep, xelqning wetenperwerlik héssiyatini yene bir qétim qozghitishtin bashqa héchqandaq amalining qalmighanliqini körsetti. (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.